Վանաձորյան անձրևը դարձյալ լվանում է ասֆալտը, փողերն ու կորցնում դրանց հետքը (լուսանկարներ)

NEWSPRESS.am-ի տեղեկություններով՝ Վանաձորում դարձյալ անձրևի տակ ասֆալտ են փռել:

Իրականում անձրևի և ձյան ներքո ասֆալտ անելը Հայաստանում, մի տեսակ, ավանադույթի է վերածվել: Ամենուր պատկերը նույնն է՝ սկսած մայրաքաղաքից… Սա արդեն զավեշտ չէ, բայց ավելի ցավալի է տվյալ համայնքների քաղաքապետերի պարզաբանումները թեմայի շուրջ:

Նրանք մեղք չունեն՝ եղանակն է մեղավոր… 

Գյումրիի քաղաքապետ Սամվել Բալասանյանն այդ առիթով, օրինակ, մի անգամ ասել է, թե նման դեպքերում՝ «ասֆալտը քանդում են ու նորից են փռում:

Ու ստացվում է, որ Գյումրիում փողոցներն անընդհատ քանդված են:

Պատկերը Վանաձորում էլ նույնն է: Այստեղ էլ քաղաքապետ Մամիկոն Ասլանյանը մի առիթով արդարացել է, թե՝ քաղաքի փողոցները չեն նորոգում, քանի որ միշտ անձրև է գալիս. «Հո չենք դնի անձրևի տակ ասֆալտ անենք: Էն օրը Հրազդանում ասֆալտել էին անձրևի տակ, լրատվամիջոցները բռնել, գրել էին, որ հորդառատ անձրևի տակ ասֆալտ են փռում…»,-ասել է քաղաքապետը: Եվ, այնուամենայնիվ, ասֆալտապատումը դարձյալ իրականացվում է անձրևի ժամանակ:

Սա արդեն խրոնիկ հիվանդության ախտանիշ է, որը մարդուն ուղեկցում է ամբողջ կյանքի ընթացքում: Մյուս կողմից էլ անձրևներին ասֆալտ փռելը փողեր լվանալու ամենահեշտ ու հարմար միջոցն է…

Հարկ է նկատել, որ Վանաձորի քաղաքապետ Մամիկոն Ասլանյանը մի առիթով արդեն ասել է, որ  «կառավարությունը, Լոռու մարզպետի միջնորդությամբ, պատկառելի գումար է հատկացրել Վանաձորին՝ մի քանի փողոցների նորոգման համար»:

Հիմա, ստացվում է այդ պատկառելի գումարի մասին կարելի է մոռանալ, քանի որ անձրևը լվանում է ասֆալտը, փողերն ու կորցնում դրանց հետքը:

Արմինե Մկրտումյան