Ռազմական արդյունաբերությունը կդառնա ՀՀ տնտեսության հիմնական շարժիչ ուժերից մեկը. Վիգեն Սարգսյան

Այս տարի մենք մարտական ծառայության մեջ ներդրել ենք ամբողջությամբ Հայաստանում մշակված և արտադրված միջոցներ, որոնք կարևոր են մարտական հերթապահության արդյունավետ իրականացման համար: Այս մասին այսօր հայտարարեց Պաշտպանության նախարար Վիգեն Սարգսյանը՝ ամփոփելով անցած 1 տարվա գործունեությունը։

Նրա խոսքով՝ արտադրված միջոցները ոչ միայն գնային առումով ունեն մի շարք առավելություններ, այլև չունեն շուկայում իրենց անալոգները։

«Կարծում եմ՝ դա նաև առաջին քայլն է դեպի մեր հիմնական նպատակ՝ ռազմական արդյունաբերությունը մեր տնտեսության կարևորագույն շարժիչներից մեկի վերածելու գաղափարը՝ արտահանում կոնցեպտի վրա ուշադրության դարձնելով: Այդ տիպի մշակումներով շատ արագ հնարավորություն ենք ունենալու միջազգային շուկաներում հետաքրքիր դառնալու որպես ոչ միայն զենք, զինամթերք ներկրող երկիր, այլ նաև բարձր տեխնոլոգիաներով մշակված և ստեղծված միջոցների արտահանող երկիր».-ասաց նախարարը:

Այս առումով նախարարն ամենակարևոր ձեռքբերումը համարում է «Ազգ-բանակ» համաժողովը, որին մասնակցեց 35 հազար երիտասարդ: Նրա խոսքով՝ երիտասարդների ակտիվ մասնակցությունը ոգևորիչ էր:

«Մասնավորապես՝ Մոնթե Մելքոնյան վարժարանը Հայաստանի լավագույն ավագ դպրոց դարձնելու մեր ծրագիրը: Եվ թեև ժամկետները շատ կարճ էին, և թվում էր՝ շատ դժվար իրականանալի ծրագիր, մեզ հաջողվեց 8 ամիսների ընթացքում նախապատրաստել կրթահամալիրն անհրաժեշտ պայմաններով և հյուրընկալել 200 մոնթեականների՝ առաջին անգամ ունենալով մրցակցային ընդունելություն: Այսինքն՝ 3 դիմորդ 1 տեղի համար… Վստահ եմ, որ հաջորդ տարի ունենալու ենք շատ ավելի մեծ մրցակցություն, որովհետև պայմանները, իրոք, լավագույնն են»,-ասաց Պաշպանության նախարարը: