Քաղաքական գարշահոտ ճաշը մատուցված է

Մեր երկրում քաղաքական ճաշը հետաքրքիր բաղադրությունի ունի. երբեմն քեզ թվում է՝ ճաշին կարտոֆիլ կա, հետո պարզվում է՝ թեև կարտոֆիլ է, բայց արդեն լոլիկի է վերածվել, կամ լոլիկ է, իրեն կարտոֆիլ է երևակայում ու խառնվել է ընդհանուր ուտեստին:

Գուցե նրանից է, որ չեն կարողանում կողմնորոշվել՝ քաղաքականության մեջ իրենք կարտոֆի՞լն են, թե՞ լոլիկը, վարո՞ւնգ են, թե՞ սմբուկ, կամ ընդհանրապես կարո՞ղ էին հայտնվել քաղաքական կաթսայում, թե՞ ոչ: Քանի որ չգիտեն իրենց կարողությունները, չեն էլ կարողանում կողմնորոշվել՝ ճաշի համն ու հո՞տն են, թե՞ պարզապես խցկվել են ճաշի կաթսան:

Կարճ ասած՝ բոլոր անհամատեղելի բաղադրիչները հայկական քաղաքական կաթսայում լավ էլ եփվում են` գրկելով միմյանց և ներհյուսվելով մեկը մյուսին: Թեև համը տհաճ է դառնում դրանից, սակայն կարևորը ճաշի բաղադրիչներն են իրենց լավ զգում, իսկ այդ ճաշը համտեսողնե՞րը: Անգամ հոտոտելիքով անսկզբունքային ճաշի բաղադրության մասին կարծիք կազմելն էական չէ. կարևորը անհամ, անգույն, անսկզբունք ճաշն է:

Ու երբ հայկական քաղաքական այդ անհասկանալի ճաշը հայտնվում է հասարակությանն ի տես, պարզվում է՝ ճաշի բաղադրիչները մեկը մյուսին փոխարինելով՝ մտել են քաղաքական ճաշի մեջ և անգամ նույն կաթսայում են հայտնվել այլ ճաշամանի թերմացքից հետո` հուսալով, որ նոր ուտեստի մեջ իրենց քաղաքական ցնցոտիները չեն երևա:

Իհարկե, կարևոր չէ, թե հասարակությունը տեսնում է բազմագույն ճաշը և հասկանում, որ թերմացքից է նաև ճաշը պատրաստված, և որ բաղադրիչները տարբեր համային որակներ ունեն և չեն կարող մեկ կաթսայում եփվել: Սակայն պարզվում է, որ հայկական քաղաքականության մեջ բոլոր բաղադրիչները համատեղվում են և համագոյակցում և կարող են մեկ կաթսայով մատուցվել:

Իսկ նման ճաշի հոտն արդեն կարևոր չէ, քանի դեռ այն մատուցված չէ, իսկ երբ մատուցվում է, ապա պարզվում է, որ քաղաքական ճաշի մեջ տեղավորվել են նախորդ քաղաքական ճաշի մնացորդները, այլ քաղաքական ճաշի թերմացքը, անհամատեղելի բաղադրիչներ կան, կան նաև այնպիսի մթերքներ, որոնցով ընդհանրապես քաղաքական ճաշ չի եփվում: Ճաշի մեջ առկա են նաև չլվացված մթերքներ, ոչ էկոլոգիական սննդամաս ու այդ ամենը եփվել է քաղաքական ճաշի փոխարեն և քաղաքական ճաշի անվան տակ:

Ու մատուցված ճաշն արդեն քիմքին և հոտոտելիքին տհաճ է, և սեղանից իսկական գարշահոտություն է բուրում, ոչ ոք այդ կերակուրը չի հավանում, սակայն ճաշի թե′ թերմացքը, թե′ փչացած բաղադրիչները, թե′ պատահական սննդամասերն իրենց լավ են զգում գարշահոտության մեջ և գոհ, որ կարող են երկրի քաղաքական ճաշն ապականել:

NEWSPRESS.am