Մեծապատիվ մուրացկանները

«Ծառուկյան» դաշինքում, նախկին «Բարգավաճ Հայաստան» խմբակցությունում ժամանակ առ ժամանակ պարզաբանումներ և հստակեցումներ են լինում, և այդ մասին տեղեկությունները միշտ էլ այս կամ այն ձևով հասնում են մամուլ:

Իհարկե, դժվար է խոստովանել, որ Ծառուկյանն է կարգավորում կուսակցության, մասնավորապես՝ խմբակցության տարաբնույթ հարցերը, սակայն փաստը մնում է փաստ:

Վերջին` ոչ երևանաբնակ պատգամավորների՝ մայրաքաղաքում վարձակալական հիմունքներով բնակվելու հարցը Ծառուկյանին հունից հանել էր: Նա հիանալի գիտի իր կուսակցության պատգամավորների ֆինանսական հնարավորությունները և զայրացել է, որ պետության բյուջեից 100 000 դրամ են մուրում` վարձակալության համար:

Իհարկե, օրենքով նրանց հասնում է Երևանում վարձակալության համար գումար տրամադրելը, սակայն այնպիսի պատգամավորներ են մուրացկանություն անում, որ անգամ Ծառուկյանի զայրույթն են շարժել:

«Ծառուկյան» դաշինքից Կարինե Պողոսյանը, ով Հովիկ Աբրահամյանի ազգականուհին է, ևս օգտվում է ԱԺ-ից բնակարանավարձ ստանալու արտոնությունից և ստանում է: Տիկնոջ համրության մասին անգամ անեկդոտներ են պտտվում, իսկ քաղաքական բանիմացությունը նրանից հեռու է մի քանի տասնյակ հազարավոր կիլոմետրերով:

Եթե Աբրահամյանի ազգականը չլիներ, չէր էլ հայտնվի ԱԺ-ում՝ որպես «անշարժ գույք», սակայն մեր երկրում նման օրինակներով ոչ ոքի չես զարմացնի: Գոնե պետության գրպանը չմտներ սույն տիկինը, որը, մեր տեղեկություններով, որևէ բնակարան Երևանում չի վարձակալել, պետության 100 000 դրամը պարզապես գրպանն է դնում:

Ինչ վերաբերում է բազմահիշատակ Վարդան Ղուկասյանին, ապա ոչ այնքան նա է պատկառանք ներշնչում, որքան նրա ունեցվածքը, իսկ 100 000 դրամ բյուջեից մուրալը սովորություն է: Չնայած նա վերջին պահին հրաժարվել է վարձակալության գումարից, սակայն ակնհայտ է `բացի փող կուտակելու բազմաթիվ ձևերից, նրա պատկառելի հարստությունը նաև նման ճանապարհով է ամբարվել:

Մամուլում տեղեկություններ կային, որ Ծառուկյանը սաստել է մեծապատիվ մուրացկան պատգամավորներին, և նրանք իրենց բնակարանավարձի դիմումներն ԱԺ-ից հետ կվերցնեն, սակայն դրանից նրանց մուրալու հակումները չեն փոխվի:

Ի դեպ, ՀՅԴ-ն էլ հետ չի մնում «ծառուկյանականներից», ՀՅԴ պատգամավոր Անդրանիկ Կարապետյանը ևս դիմել է բնակարանի վարձավճար ստանալու համար:

Նշենք, որ ըստ հայտարարագրի՝ մեկ տարվա կտրվածքով Կարապետյանի միակ եկամուտը եղել է աշխատավարձը, որը կազմել է 1 միլիոն 560 հազար դրամ, այսինքն՝ ամսական 130,000 դրամ: Փոխարենը որպես դրամական միջոց նրա հաշվին եղել է 150 միլիոն դրամ:

Որպես անշարժ գույք՝ Անդրանիկ Կարապետյանը հայտարարագրել է Արմավիրի մարզի Հայկաշեն գյուղում գտնվող 14 հեկտար գյուղատնտեսական նշանակության հողատարածք, իսկ շարժական գույք՝ «Տոյոտա Լանդկրուզեր» մակնիշի ավտոմեքենա. աղքատություն աղքատությանց, մեծապատիվներ:

NEWSPRESS.am