Նախկին գլխավոր դատախազն ատա՞մ ունի ոստիկանության կամ ԱԱԾ-ի վրա

Նախկին գլխավոր դատախազ Գևորգ Կոստանյանը Ազգային ժողովում ուշագրավ հայտարարություն է արել: Մասնավորապես, վենդետայի դեպքերի առնչությամբ նշել է, որ «դա խոսում է տվյալ դեպքերի որևէ փուլում անպատժելիության փաստի մասին» և որ դա «անպատժելիության մթնոլորտի դրսևորման արդյունքն է»:

«Իհարկե, դա չի նշանակում, որ մեր իրավապահ համակարգն անգործության է մատնված, դա նշանակում է, որ մենք պետք է ուժեղացնենք հանցավորության դեմ պայքարը»,– ասել է նա:

Նշենք, որ հաճախ է քննարկվում հանցավոր դեպքերը ոստիկանության կողմից կանխարգելելու հնարավորության մասին. հնարավոր է կանխարգելել, սակայն սա վիճելի դրույթ է, միևնույն ժամանակ դրա մեջ կա ճշմարտության հատիկ:

Վերջին շրջանում հայաստանյան իրականությունը, կարծես, կրակահերթերի, սպանությունների, զենքի կիրառման հաջորդական դրվագների հանրագումար լինի, և ոմանք հիշում են Վանո Սիրադեղյանին: Պատմությունը սիրում է ճոխություն, սակայն փաստ է, որ 90-ականներին գրեթե ամենօրյա կրակահերթերը կամաց-կամաց դադարեցին. զենքի մի մասը մնաց, սակայն կրակոցները դադարեցին կամ խիստ կրճատվեցին:

Չմոռանանք, որ այդ տարիներին քանի-քանի պաշտոնյաներ պարզապես սպանվեցին, իսկ դա կարող է նաև նշանակել, որ ում պետք էր, վերացրին, որից հետո էլ կրակոցները քչացան: Իսկ այժմ պատկերը փոքր-ինչ այլ է. այժմ մարդկանց վերացնում են՝ վախեցնելով, բանտարկելով, չվճարելով, սպառնալով երկրից արտաքսել. ձևերը փոխվել են:

Այնուամենայնիվ, զենքի կիրառմամբ հաճախակի դեպքերը գալիս են ապացուցելու, որ մարդկանց մոտ զգալի քանակով զենք կա` գրանցված և չգրանցված, իսկ հատկապես անօրինական զենքերն ինչպես հավաքագրել, որոնք հետագայում մարդկային կյանքեր չարժենան, սա հարց է: Այստեղ ոստիկանությունը գործ ունի անելու և երևի թե իր լուծումներն ունի, ի վերջո պատկան կառույց է, սակայն այս ամենին նախկին գլխավոր դատախազի ակնարկն ավելի քան ակնհայտ է դարձնում ոստիկանության հետ նրա ոչ բարիդրացիական հարաբերությունների մասին:

Լինելով նախկին գլխավոր դատախազ՝ Կոստանյանն, անշուշտ, տեղյակ է, թե համակարգն ինչպես է գործում և այդ մասին ակնարկելը, թե թերացում է ոստիկանության կողմից, ենթատեքստ ունի:

Չի բացառվում, որ Ազգային անվտանգությունը ևս կա Կոստանյանի ենթատեքստում, ի վերջո ԱԱԾ ղեկավար Կուտոյանի և նախկին գլխավոր դատախազ Կոստանյանի հարաբերությունները բարիդրացիական չեն:

Ինչ-որ է, փաստ է, որ Կոստանյանը քննարկում է ուժային կառույցների՝ «անպատժելիության մթնոլորտին» մատների արանքով նայելու հարցը, իսկ թե ինչո՞ւ է նա քար ներտում ուժայինների բախչան, սա արդեն կարող է հեռուն գնացող ակնարկ լինել, սակայն մոռանում է, որ ինքն էլ մի ժամանակ նույն բախչայից էր:

NEWSPRESS.am