Շուշիի արհեստագործական ուսումնարանի ուսանողներն ուսմանը զուգահեռ՝ աշխատում են (լուսանկարներ)

2015 թվականից Արցախի Շուշի քաղաքում գործում է «Եզնիկ Մոզյան արհեստագործական ուսումնարանը»։ Այստեղ ուսանողները սովորում են Էլեկտրատեխնիկա, փայտամշակում, մետաղամշակում, դիզայն և այլ արհեստագործական մասնագիտություններ։

NEWSPRESS.am–ի հետ զրույցում ուսումնաարտադրական աշխատանքների գծով փոխտնօրեն Իզա Նազարյանը պատմեց, որ ուսումնարանի բարերարը՝ Եզնիկ Մոզյանը, եղել է եղեռնից փրկվածների ընտանիքից։ Նա մեծացել է Փարիզում և եղել է կար անող։ Հետագա տարիներին ներդրումներ է արել անշարժ գույքի գործակալությունների ոլորտում և տարիների ընթացքում հարստացել: Նա ամուսնացած չի եղել և, երբ 2009 թվականին մահացել է, պարզվել է, որ  իր ունեցվածքը կտակել է Արցախին՝ կառուցելով արհեստագործական ուսումնարան։

«Նա կար անող է եղել, ուստի հակադարձելով իր մասնագիտությանը՝ որոշել է ստեղծել հենց արհեստագործական ուսումնարան։ Եզնիկ Մոզյանը միշտ ասել է հետևյալ նախադասությունը․ «Եթե մարդու հագուստը վատ կարած լինի, ապա նա չի մահանա, իսկ եթե վատ կառուցվի շենքը, ապա երկրաշարժի ու պատերազմի ընթացքում տեղի ունեցող ռմբակոծության ժամանակ կավերվեն շենքերն ու կմահանան շատ մարդիկ»»,-պատմեց Իզա Նազարյանը:

Նրա խոսքով՝ 2009 թվականին որոշվեց, որ այս ուսումնարանը պետք է բացվի հենց Շուշիում։ 2012 թվականին սկսվեց շինարարությունը, իսկ 2015 թվականին շենքը շահագործվեց:

Ի․Նազարյանն ընդգծեց, որ ուսումնարանի բոլոր մասնագետները բացառապես Արցախից են, ովքեր 2015 թվականին մեկնել են Ֆրանսիա և վերապատրաստվել։ Նա ներկայացրեց նաև, թե ինչպես է իրականացվում ընդունելությունն ու ուսումը։

«Մեզ մոտ ընդունվում են բացառապես Արցախի երեխաները։ Առայժմ մեզ մոտ միայն տղաներ են։ Ընդունելությունը տեղի է ունենում 9-րդ դասարանից։ Երեխաներն այստեղ սովորում են 2 կամ 3 տարի։ Ընդունելության առաջին 2 շաբաթվա ընթացքում նրանք ծանոթանում են մասնագիտություններին և նոր որոշում, թե որ ուղղությամբ են սկսելու սովորել։ Մենք ամեն կերպ օգնում ենք երեխաներին, որ ընտրեն ճիշտ ու իրենց համապատասխան մասնագիտություն։ Առաջին երկու տարվա ընթացքում մասնագիտական առարկաների հետ մեկտեղ սովորում են նաև հանրակրթական բոլոր առարկաները»,- ասաց փոխտնօրենը:

Փոխտնօրենը խոսեց նաև ուսումնարանի առավելությունների ու պայմանների մասին՝ ընդգծելով, որ հայ-ֆրանսիական ուսումնարանը տարածաշրջանում միակն է իր տեսակի մեջ։

«Ուսումնարանում սովորող երեխաները չեն ծախսում նույնիսկ 1 դրամ։ Մենք նրանց տրամադրում ենք 3 անգամյա սնունդ, հանրակացարան, որը նման է 4 աստղանի հյուրանոցի, հագուստ, կոշիկներ, անվճար ուսում, հոգատարություն ու բարոյահոգեբանական օգնություն։ Այս ամենն անվճար է։ Ստեփանակերտից ու Շուշիից ժամանող երեխաների համար կա հատուկ անվճար ավտոբուս։ Սրանից զատ մենք Արցախի կառավարության հետ ունենք համագործակցություն, ըստ որի մեր լավագույն ուսանողները, ովքեր ավարտել են առաջին կուրսը, կարող են աշխատել այն ոլորտներում, որն ուսանել են ուսումնարանում։ Այդ շինարարական ընկերությունները, որտեղ աշխատում են մեր ուսանողները, ստանում են հարկային արտոնություններ։ Իսկ մեր երեխաները աշխատում են ընդամենը 4 ժամ, քանի որ օրենքով անչափահասները կարող են աշխատել այդքան։ Այդ կազմակերպություններին վստահում ենք միայն մեր լավագույն ուսանողներին»։

Զրույցի վերջում Իզա Նազարյանը հավելեց նաև, որ 130 ուսանող ունեցող ուսումնարանը կարող է ուսուցանել ու պահել մինչև 450 ուսանողի։ Նա նշեց նաև, որ ապագայում նախատեսվում է ուսումնարանում բացել աղջիկների համար նախատեսված ուսումնական կենտրոններ ու պայմաններ։