Պատգամավորը որևէ կալանավորի մորքուրի մարդը չէ. Էդմոն Մարուքյան

«Չենք ուզում տեսակցել կալանավորին, ուզում ենք տեսնենք էդ մարդու մատները տեղո՞ւմ են, թե՞ չէ»: Ազգային ժողովում «Ելք» խմբակցության կողմից ներկայացված նախագծի մասին ելույթի ժամանակ ասաց «Ելք» խմբակցության ղեկավար Նիկոլ Փաշինյանը:

Նա ԱԺ նիստին ներկայացրեց գլխադասային հանձնաժողովում բացասական եզրակացություն ստացած «Ձերբակալված և կալանավորված անձանց պահելու մասին ՀՀ օրենքում փոփոխություններ կատարելու մասին» ՀՀ օրենքի նախագիծը:

Այս նախագիծը ենթադրում է մի շարք պաշտոնյաների և ԱԺ պատգամավորների անարգել մուտքը՝ քրեակատարողական հիմնարկներ:

Փաշինյանը նկատեց, որ գործող օրենքով պատգամավորի մուտքը որևէ տեղ չպետք է արգելվի, մինչդեռ իրականում այդպես չէ:

«Մարդը զանգում է պատգամավորին, ասում է` ամուսինս ՔԿՀ-ում է, ու մատները կտրել են, եղունգները քաշել են, խոշտանգումների են ենթարկվել: Պատգամավորը գնում է, ՔԿՀ-ում ասում է, որ նման ահազանգ է եղել, ուզում է տեսնել՝ այդ կալանավորված անձի մատները տեղո՞ւմ են, թե՞ չէ: Ասում են` չէ, քննիչը արգելել է տեսակցությունը: Մենք ասում ենք` չենք ուզում տեսակցել, ուզում ենք տեսնենք էդ մարդու մատները տեղո՞ւմ են, թե՞ չէ, ի վերջո, խոշտանգե՞լ են, թե՞ չէ, մարդը կենդանի՞ է, թե՞ չէ, ձեռքը ջարդա՞ծ է, թե՞ չէ, սննդից զրկվա՞ծ է, թե՞ չէ»,-նկատեց Փաշինյանը:

«Ելք» խմբակցության պատգամավոր Էդմոն Մարուքյանն էլ նշեց, որ կալանավորներին, դատապարտյալներին տեսակցելու պատգամավորների իրավունքները սահմանափակվել են այն ժամանակ, երբ ՀՀ արդարադատության նախարար է դարձել Հրայր Թովմասյանը: Մարուքյանը նշեց նաև, որ իրենց կողմից ներկայացված նախագծի մերժումը կտանի «դեսկտրուկտիվ գիծ»: Քանի որ վերջին շրջանում ներկայացրած իրենց բոլոր նախագծերը մերժվել են:

«Բոլոր քննարկումները բացառելը, քաղաքական փոքրամասնության բոլոր նախագծերը մերժելը տանում է դեպի դեսկտրուկտիվ գիծ: Հետո չասեք, որ, վա՜յ, ինչ ասում ենք՝ ընդդիմությունը դեմ է: Բա ո՞նց ա, որ մենք ինչ ասում ենք, դուք դեմ եք: Պատգամավորն էլ որևէ կալանավորի մորքուրի մարդը չէ, որ գնում է տեսակցելու, որ սնունդ, սիգարետ տանի, այլ գնում է իր գործառույթները կատարելու: Միայն Հրայր Թովմասյանը կարող էր նման մեկնաբանություն տալ, նրա օրոք այդ նորմը սկսեց մեկնաբանվել հակասահմանադրական, և ապօրինի ձևով սահմանափակվեցին պատգամավորների իրավունքները»,-ասաց նա: