«Մեր բոլոր առաջարկները ձեզ համար ճանապարհ են դեպի դժոխք». Փաշինյան

«Պաշտպանության մասին» օրինագծով հստակ սահմանված չէ, թե ով է նշանակում ՀՀ զինված ուժերի շտաբի պետին: Այս մասին այսօր՝ հոկտեմբերի 24-ին, Ազգային ժողովում օրինագծի քննարկման ժամանակ ասաց ԱԺ «Ելք» խմբակցության ղեկավար Նիկոլ Փաշինյանը:

«Ասվում է, որ գլխավոր շտաբի պետը նշանակվում է էսքան ժամկետով, բայց թե ով է նշանակում՝ չկա: Կա ընդհանուր ձևակերպում, որ վարչապետը նախագահին առաջարկներ է ներկայացնում բարձրագույն կազմի սպայական նշանակումների վերաբերյալ: Այսինքն՝ մեզ համար գլխավոր շտաբն ու շտաբի պետն առանձնահատուկ նշանակություն ունեցող պաշտոնյանե՞ր են, թե՞ հերթական պաշտոնյաներ»,-իր հարցն ուղղեց հարակից զեկուցող Կորյուն Նահապետյանին Նիկոլ Փաշինյանը:

Նրա կարծիքով՝ ապրիլյան քառօրյա պատերազմը ցույց տվեց, որ օրենքում դրված գլխավոր շտաբի կառուցվածքն ու փիլիսոփայությունը չեն արդարացվել:

«Մեր գլխավոր շտաբի պետերի հասցեին անընդհատ կոռուպցիայի մեղադրանքներ են հնչել, սկանդալային իրավիճակ է ստեղծվել: Չի կարող այնպես լինել, որ զինված ուժերի գլխավոր շտաբի կառավարման սկզբունքների հարցը լինի վարչապետ-պաշտպանության նախարար-շտաբի պետ, կներեք էս բառիս համար, մեժդուսաբոյչիկի ինչ-որ խնդիր»,-ասաց պատգամավորը:

Արձագանքելով Նիկոլ Փաշինյանին՝ Կորյուն Նահապետյանը նշեց, որ այս հարցադրումների պատասխաններն արդեն տրված են, իսկ եթե թերի որևէ բան կա, կարելի է շտկել:

Ինչ վերաբերում է շտաբի գլխավոր պետի պաշտոնին, ապա, ըստ Նահապետյանի, Փաշինյանի նշած կետերը համապատասխան դրույթներում նշված են, և պետք է որ փարատեն նրա մտահոգությունը:

Անդրադառնալով սկանդալային, կոռուպցիոն լուրերի շրջանառմանը, նա նշեց. «Եթե դուք գիտեք նման դրսևորում, ներկայացրեք նման փաստեր և համապատասխան քայլեր կձեռնարկվեն: Իսկ հակակշիռների մասով ես հեռու եմ այն մտքից, որ օրենքի քննարկման այս փուլում ինստիտուցիոնալ բոլոր հակակշիռները և զսպումները ստեղծված են: Սակայն, քննարկումների միջոցով պետք է ճիշտ լուծումներ գտնել, արեք ձեր առաջարկությունները»,-ասաց նա:

«Առաջարկություններ անելու մասին ձեր առաջարկը շատ լավն էր»,- նկատեց Նիկոլ Փաշինյանը՝ հավելելով. « Երբ առաջարկ չենք անում, ասում եք՝ արեք, երբ անում ենք դրանք, չեք ընդունում, ասում եք՝ ձեր առաջարկը կտանի դեպի դժոխք: Հիմա ի՞նչ առաջարկ անենք, մեր բոլոր առաջարկները ձեզ համար ճանապարհ են դեպի դժոխք, մենք դժոխք չենք ուզում գնանք»: