Ինչո՞ւ է թանկանում միսը

Սննդի անվտանգության պետական ծառայության պետ Իշխան Կարապետյանը երեկ ԱԺ-ում ներկայացրեց «Վարչական իրավախախտումների մասին» օրենսգրքում, «Սննդամթերքի անվտանգության մասին», «Անասնաբուժության մասին» օրենքներում փոփոխություններ ու լրացումներ կատարելու մասին օրինագծերի փաթեթը:

Փոփոխությունները հիմնականում վերաբերում էին մորթի պայմաններին և պահանջներին. խոսքն այն մասին է, որ պետք է մորթն իրականացնել միայն սպանդանցներում, և մսամթերքի մակնշման վրա պետք է լինի նաև սպանդանոցի վերաբերյալ տվյալներ:

Հակառակ դեպքում, իրավախախտների համար սահմանված են վարչական տույժեր. ֆիզիկական անձանց համար այն կկազմի 20 000 դրամ, իսկ պաշտոնական անձանց դեպքում՝ 100 000 դրամ, եթե միսը նախատեսված է իրացման համար, իսկ ոչ սպանդանոցային պայմաններում մորթը կթույլատրվի կրոնական ծիսակատարությունների, ինչպես նաև անձնական օգտագործման համար:

Մորթը միայն սպանդանոցներում կատարվելու մասին տեսլական կար մի քանի տարի առաջ, սակայն այն ժամանակ խոսքը բակային մորթն արգելելու մասին էր, քանի որ այն, բացի սանիտարահիգիենիկ խնդիրներից, նաև հակահասարակական, հակաէսթետիկական հարցեր էր պարունակում իր մեջ:

Այնուամենայնիվ, անընդունելի էր, որ հենց փողոցի վրա մորթ է կատարվում, և հատկապես երեխաների, զբսաշրջիկների, և սուր զգացողություններից հեռու մարդկանց համար նման տեսարանը հոգեբանական խնդիրներ էր առաջացնում:

Իսկ թե ինչու է բակային մորթի արգելքի վերաբերյալ դրույթը հանվել, պարզ չէ, սակայն չի բացառվում, որ նկատի են ունեցել որոշ հանգամանքներ: Արդեն իսկ իրացման համար նախատեսված մորթը հիմնականում տեղի է ունենում սպանդանոցներում, քանի որ մսամթերքի մեծ քանակության դեպքում մորթ կատարելու ավելի հարմարավետ տեղ, քան սպանդանոցը, դժվար է գտնելը:

Ի դեպ, սպանդանոցներից օգտվելը գումար արժե. կենդանու սեփականատերը պետք է մեքենա ունենա՝ անպայման թափքով, հակառակ դեպքում՝ մարդատար մեքենայով խոշոր կամ անգամ մանր եղջերավոր կենդանի հնարավոր չէ տեղափոխել, պետք է մեքենայի համար վճարել, տեղափոխել, վճարել սպանդանոցում, հետ բերել, որից հետո օգտագործել՝ ըստ նշանակության:

Եթե, օրինակ, իրացման համար նախատեսված երկու խոշոր եղջերավոր կենդանու մորթ պետք է իրականացվի, ապա այստեղ սեփականատիրոջ ծախսերն ավելանում են, իսկ, ինչպես հայտնի է, մսի վաճառքով զբաղվողները, սովորաբար, միջնորդներն են և անասնապահներից է պահանջվում վերընշված բոլոր գործողությունները կատարել, վճարել, որից հետո այն հանձնել գնորդին:

Սա կարող է բերել հետևանքների. կբարձրանա մսի գինը թե′ մասնավոր, թե′ հանրային կետերում:

Իհարկե, սպանդանոցների գաղափարը ճիշտ է ունենալ ոլորտում, սակայն յուրաքանչյուր դրական քայլի դիմաց կա նաև հակառակ ազդեցությունը. այս դեպքում լոգիստիկայի խնդիրներն են, որոնք բերելու են մսի գնի բարձրացման:

Կենդանիների արտահանում կարող է մեծաքանակ չլինել, սակայն սպանդանոցներից մշտապես օգտվելը մսի գինը միշտ պահելու է բարձրության վրա:

NEWSPRESS.am