Ոճրագործությունը պետք է պատժվի. հարգանքի տուրք՝ Հոկտեմբերի 27-ի զոհերի հիշատակին

Վանաձորում հարգանքի տուրք մատուցվեց 1999 թվականի հոկտեմբերի 27-ին Ազգային ժողովում գնդակահարված սպարապետ Վազգեն Սարգսյանի, Կարեն Դեմիրճյանի և ազգային ու պետական մյուս գործիչների հիշատակին:

1999թ. հոկտեմբերի 27-ից անցել է 18 տարի: Այսօր էլ, դատապարտելով ոճրագործությունն ու հավաստելով բոլոր զինվորների հավատարմությունը՝ Սպարապետի պատգամներին, N զորամասի երրորդ բանակային կորպուսի ողջ անձնակազմը՝ պաշտոնյա այրերի հետ միասին, սգո երթ էին կազմակերպել դեպի Վազգեն Սարգսյանի հուշարձան: Նրանց ուղեկցում էր զորամասի նվագախումբը:

Ծաղիկներ խոնարհելով սպարապետի արձանին՝ NEWSPRESS.am-ի հետ զրույցում, զինվորները պատրաստակամություն հայտնեցին իրենց բարեխիղճ ծառայությամբ կրել սպարապետի գաղափարներն ու կյանքի կոչել դրանք:

Սգո երթի մասնակիցները թերևս հակված էին այն մտքին, որ 1999 թվականին խորհրդարանում տեղի ունեցած ողբերգությունը երբեք անցյալ չի դառնում, այդ վիշտը մշտապես հայ ժողովրդի հետ է: 3-րդ բանակային կորպուսի հրամանատարի տեղակալ, գնդապետ Հայկ Պետրոսյանը ասաց.

«Մենք այսօր ունենք զարգացած, հզոր ազգային բանակ, որը սպարապետի աշխատանքի շնորհիվ է ստեղծվել: Ոճրագործության զոհերը մեծ գաղափարներ և նպատակներ ունեին, որոնց իրագործման հարցում պատասխանատու է յուրաքանչյուրը, և որը մենք փոխանցում ենք մեր զինվորներին»:

«Մենք այսօր ունենք արհեստավարժ բանակ, որն ի զորու է պաշտպանել երկրի սահմանները»,-մեզ հետ զրույցում նկատեց զինվորներից մեկը:

Մասնակիցները վստահ են՝ ամեն անգամ, հարգանքի տուրք մատուցելով զոհերի հիշատակին՝ հիշեցնում ենք սերունդներին, որ ոճրագործությունը պետք է պատժվի: