Աստված պահի ՀՀԿ-ն

Հավիտենական է երկինք ու երկիր, ծով և օվկիանոս, տիեզերք և օդ, հավիտենական է նաև ՀՀԿ-ն` ինչպես աշխարհի բոլոր հին ու նոր տարրերը:

Հին աշխարհում ասում էին, որ աշխարհը պահող հիմնասյուներից մեկը, երբ ոչնչանա, ապա մոլորակը հակառակ ուղղությամբ կպտտվի, թթվածնի փոխարեն կշնչենք ածխաթթու գազ, ջուրն ընկնելու փոխարեն կմնանք ջրի երեսին, սակայն Հին աշխարհում չգիտեին, որ գալու է մեկ պահ, երբ աշխարհի հիմնարար սյուներին ավելանալու է ևս մեկ անքակտելի տարր՝ ՀՀԿ-ն և այն նույնպես ցուցակագրվելու է հիմնասյուների թվին՝ ազատ, թափանցիկ ընտրությունների միջոցով հայտարարվելու է դասական, ինչպես օդը, ջուրը, հողը, կրակը:

Ու այժմ երկիր մոլորակն իր ընթացքից չգցելու համար, պետք է պահել-պահպանել ՀՀԿ-ն, ինչքան հնարավոր է երկար, ինչքան հնարավոր է պինդ ձեռքերով, որ մեր տիեզերքը փուլ չգա մեր գլխին:

Ի դեպ, աշխարհի գիտնականներն զբաղված են ՀՀԿ-ի մոլեկուլներն ու ատոմները ստուգելով, և ամեն անգամ նոր բացահայտումներ են լինում, ֆիզիկական օրենքներին անծանոթ նոր ատոմներ են ի հայտ գալիս, որոնք այնպես ամուր են կառչած ՀՀԿ-ին, որ անզեն աչքով տեսանելի չեն: Բացի այդ, կան ատոմներ, որոնք անվտանգության քողով են պատված, և նրանց գտնելն այնքան էլ հեշտ գործ չէ, նրանք ամենուր են, սակայն անգամ մանրադիտակը նրանց չի կարողանում տարբերել՝ ի վերջո ՀՀԿ-ն են, թե այլ՝ ոչ ազնիվ մետաղ:

Իսկ ավելի խոշոր մոլեկուլներն արտաքինից պաշտպանում են ՀՀԿ-ն, քանի որ որևէ այլ նյութի մեջ չեն կարող տեղավորվել՝ միայն ՀՀԿ-ի և ամեն կերպ պաշտպանում են այս տարրը:

Թեև ՀՀԿ-ն մյուս աշխարհաստեղծ տարրերից երիտասարդ տարր է, սակայն դեռևս չի հասցրել բյուրեղանալ, դեռևս անազնիվ վիճակում է, և այդ է պատճառը, որ աշխարհի գիտնականներն այս նոր տարրը դեռևս չեն ցանկանում ընդգրկել աշխարհաստեղծ տարրերի շարքին, սակայն ի զարմանս աշխարհի գիտնականների՝ ՀՀԿ-ն իր համառությամբ, փորձում է խցկվել և իր տեսակարար կազմով ապահովել իր տեղը աշխարհի հիմնարար սյուների կողքին:

Եվ, ո՜վ զարմանք, ո′չ կրակը կարողացավ ոչնչացնել ՀՀԿ-ն, ո′չ ջուրը կարողացավ հանգցնել ՀՀԿ-ի բոցկլտանքը, ո′չ հողը կարողացավ ծածկել ՀՀԿ-ի ցոլցլանքը, ո′չ էլ օդը կարողացավ փակել ՀՀԿ-ն՝ իր խողովակներով:

Վերջին անալիզները ցույց են տվել, որ որքան էլ զարմանալի է, սակայն բնության մեջ նման տարրի գոյությունն ի սկզբանե դատապարտված է չգոյության, սակայն ֆենոմենն այն է, որ ունենալով փչացած միջուկ, ունենալով ժանգոտ ատոմներ, ունենալով անհավասարակշիռ մոլեկուլներ, ունենալով խաբուսիկ արտաքին՝ շերտ այս տարրը փորձում է դասվել աշխարհի հիմնասյուների շարքին. ասում են՝ ազատ, արդար, թափանցիկ ընտրություններով է քվեարկությունն անցել, իսկ թե ո՞վ է քվեարկել ՀՀԿ-ի օգտին` որպես աշխարհի հիմնասյուն, քրեական գործ չկա:

NEWSPRESS.am