Հանցագործ աշխարհը որոշել է տեղի չտալ. ՔԿՀ վարչության ստուգումները կհանգեցնեն բախումների

NEWSPRESS.am–ի տեղեկություններով՝ «Վանաձոր» քրեակատարողական հիմնարկում տեղի ունեցած ձերբակալություններից հետո ՀՀ ԱՆ ՔԿՀ վարչությունը որոշել է «ծնկի բերել» քրեակատարողականում գտնվող քրեական հեղինակություններին: Մեր աղբյուրի համաձայն՝ ՔԿՀ-ներում սկսվել են լայնածավալ ստուգումներ և հետախուզական աշխատանքներ:

Վանաձորից հետո փորձ է արվել ստուգումներ անցկացնել «Գորիս» ՔԿՀ-ում, սակայն այստեղ ստուգումները հարթ չեն անցել: Վարչության աշխատակիցները հանդիպել են դիմադրության:

Նույն աղբյուրի փոխանցմամբ՝ բռնություն է կիրառվել այն դատապարտյալների նկատմամբ, ովքեր թույլ չեն տվել ստուգել իրեն խցերը, ինչի հետևանքով տեղի է ունեցել բախում և «գողական բունտ»:

Վարչության աշխատակիցները, վնասվածքներից խուսափելու համար, հրաժարվել են հատուկ գործողություններից:

Ինչ վերաբերում է մյուս քրեակատարողական հիմնարկներին, ապա, մեր տեղեկություններով, դատապարտյալները լարված սպասում են վարչության աշխատակիցների գործողություններին և պատրաստվում են դիմադրել իրենց «կացարանների վրա եկող ռեյդին»:

Տեղեկություններ կան նաև, որ ՔԿՀ վարչությունը տարակուսանքի մեջ է՝ շարունակի՞ ստուգումները, թե՞ ոչ. չի բացառվում, որ նման գործողությունները շարունակելու դեպքում, «գողերի դաբրոյով», բոլոր ՔԿՀ-ներում դատապարտյալների կողմից բունտ բարձրանա և հանգեցնի բախումների:

Հիշեցնենք, որ օրերս «Վանաձոր» ՔՀԿ-ում, կաշառք պահանջելու և ստանալու, պաշտոնեական դիրքը չարաշահելու, ինչպես նաև կաշառք տալուն օժանդակելու կասկածանքով ՀՀ հատուկ քննչական ծառայության քննիչի որոշմամբ ձերբակալվել են ՀՀ ԱՆ «Վանաձոր» քրեակատարողական հիմնարկի 5 ղեկավար պաշտոնատար անձինք և նրանց կաշառք տալուն օժանդակած անձը:

Պաշտոնատար անձինք, նախնական համաձայնությամբ, 2017 թվականի ընթացքում դատապարտյալներից պարբերաբար պահանջել և որպես կաշառք ստացել են տարբեր չափերի գումարներ: Դրա դիմաց նրանց տրվել են տարբեր խցեր անարգել ելումուտ կատարելու, թղթախաղով զբաղվելու, թմրանյութ օգտագործելու, քրեակատարողական հիմնարկ արգելված իրեր մտցնելու և այլ անօրինական գործողություններ կատարելու արտոնություններ: