Հովիկ Աբրահամյանի վերջին խոսքը

Օրերս մամուլում տեղեկություն կար այն մասին, որ նախկին վարչապետ Հովիկ Աբրահամյանը հիվանդանոցում է. նրան տեղափոխել էին «Աստղիկ» բժշկական կենտրոն, իսկ բուժանձնակազմին և հիվանդներին տարհանել էին՝ զրկելով նրանց նախկին վարչապետ տեսնելու հաճույքից:

Իհարկե, տարատեսակ մեկնաբանություններ եղան, թե ի վերջո, ի՞նչ է պատահել Հովիկ Աբրահամյանին, նա հիվա՞նդ է կամ ի՞նչ հիվանդություն ունի:

Եվ որպեսզի նրա հիվանդության վերաբերյալ խոսակցությունները հեռուն չգնան կամ չփորփրեն, թե այդ ինչ հիվանդությամբ է տառապում նախկին վարչապետը, նա բոլորովին հանկարծակի հայտնվեց Արցախում, որտեղ այցելել էր Արցախի նախագահ Բակո Սահակյանին, միասին լուսանկարվել:

Թվում է՝ անմեղ լուսանկար է ՀՀ նախկին վարչապետի և Արցախի հանրապետության ներկայիս նախագահի և վարչապետի մասնակցությամբ, սակայն հարցը միայն լուսանակարը չէ: Այն ուղերձ է քաղաքական հանրությանը, Հովիկ Աբրահամյանին բարիք չկամեցողներին, նրա անկման շուրջ պսակ հյուսողներին, որ առնվազն 2018 թվականին Հովիկ Աբրահամյանը կրկին ձիու վրա է լինելու, և այդ թողտվությունը նրան տվել է հենց Սերժ Սարգսյանը:

Ինչո՞ւ: Որովհետև առանց ՀՀ նախագահի գիտության Արցախի նախագահը և վարչապետը չէին լուսանկարվի Հովիկ Աբրահամյանի հետ: Դա պարզապես լուսանկար չէր, այլ մարտահրավեր, մեսիջ՝ ուղղված նախ Աբրահամյանին բարիք չկամեցողներին, քաղաքական հակառակորդներին և հանրությանը, եթե իհարկե հանրությանն այժմ հուզում է Հովիկ Աբրահամյան քաղաքական ֆիգուրը:

Այն խոսակցությունները, թե Աբրահամյանը շնորհազրկված է, որ նա այլևս Սերժ Սարգսյանին պետք չէ, կամ նրա աստղն արդեն մարել է, պարզապես խոսակցություններ են. մեկ լուսանակարն ավելի խոսուն է, քան հարյուրավոր տարբեր խոսակցություններ, որտեղ ճշմարտության հատիկները մանրադիտակով պետք է փնտրել՝ այնքան որ կեղծիքն ու շինծու հորինվածքը շատ են:

Խոսակցություններ են պտտվում, որ 2018 թվականից հետո Հովիկ Աբրահամյանը լինելու է վարչապետի տեղակալներից մեկը, և Բակո Սահակյանի և Արա Հարությունյանի հետ վերջին լուսանկարն այս խոսակցությունների ճշմարտանման հատիկներից է. այժմ Աբրահամյանը պահ է մտել, մինչև փոխվարչապետական թռիչքը: Նա կարծես դժգոհ չէ, կարող էր ավելի վատ լինել:

Իհարկե, չի բացառվում նաև, որ Հովիկ Աբրահամյանը հիվանդանոցում է, և այս լուսանկարը պարզապես հանրության համար է՝ կրկին նույն նպատակի համար, վերջնաարդյունքը, սակայն, նույնն է. սպասենք Հովիկ Աբրահամյանին նաև 2018-ին:

NEWSPRESS.am