Կաբինետս կաբինետ չի. վարչապետին այլ բան չի մնացել անել, քան զարմանալ

Հրապարակվել է Համաշխարհային բանկի ամենամյա Doing Business զեկույցը, որտեղ նախորդի համեմատ Հայաստանը 9 կետով զիջել է իր դիրքերը՝ 38-րդ տեղից զբաղեցնելով 47-րդ տեղը:

Համաշխարհային բանկի տարածած հաղորդագրությունում նշվում է, որ նախկինում հրապարակված վարկանիշի այս փոփոխության հիմնական պատճառներն են՝ այլ տնտեսությունների գործարարության կարգավորման միջավայրերի նշանակալի բարելավումները, մեթոդաբանական շտկումները և տվյալների վերանայումները:

Տարածաշրջանի երկրներից Վրաստանը վերջին 15 տարում իրականացրել է ամենամեծ՝ ընդհանուր թվով 47 բարեփոխում և, ըստ այդմ, Վրաստանը նախորդ տարվա համեմատ 8 կետով բարելավել է իր դիրքը՝ 190 պետության շարքում զբաղեցնելով 9-րդ տեղը:

Վրաստանի նման հաջողությունը հուշում է, որ հարևան երկրում հաջողությամբ կարելի է բիզնես անել, մի բան, որ Հայաստանում դժվար է՝ ըստ Duing Busines-ի. մի բան է լինել 9-րդ տեղում ՝ գրանցելով առաջընթաց, մեկ այլ բան՝ 47-րդում՝ գրանցելով հետընթաց:

Մեծ հաշվով, սա Հայաստանի իրական տնտեսական զարգացվածության և ներդրումների առումով իրականությունն է՝ առանց պաշտոնյաների դատարկախոսությունների, առանց Ազգային վիճակագրական ծառայության զարդանախշերի և առանց Կենտրոնական բանկի աճպարարությունների:

Միջազգային կառույցները, հատկապես ներդրումների առումով, նշում են ՀՀ-ում կոռուպցիոն ռիսկերի մասին, որի դեպքում ցանկացած բիզնեսմեն կզգուշանա ներդրումներից՝ չցանկանալով հայտնվել հարկային, մաքսային, ձևակերպումների առումով տհաճ իրավիճակում:

Վարչապետ Կարեն Կարապետյանը փորձել է փրկել իրավիճակը՝ ասելով. «Զեկույցում դասակարգման հիմք հանդիսացող ինդեքսում մենք արձանագրել ենք 0,59 կետով փաստացի աճ, այնուամենայնիվ, երկրների խիստ մրցակցության պայմաններում դա բավարար չի եղել ոչ միայն առաջ գնալու, այլև նույն տեղում մնալու համար»։

Ի դեպ, հիշեցնենք, որ դեռևս այս տարվա մայիս ամսին Կարեն Կարապետյանը հանձնարարել է տնտեսական զարգացման և ներդրումների նախարարությանը, որ Doing Business-2017 միջոցառումների ծրագրի նախագիծը քննարկի բիզնես հանրության ներկայացուցիչների և միջազգային գործընկերների հետ, սեղմ ժամկետում լրամշակի՝ նրանց, ինչպես նաև շահագրգիռ գերատեսչությունների առաջարկություններով և վերջնական տարբերակը ներկայացնի կառավարություն:

Արդյունքում ո′չ նախարարությունն է որևէ քայլ ձեռնարկել, ո′չ կառավարությունը. վարչապետին մնացել է միայն զարմանալ սեփական կաբինետի անգործության և Doing Business զեկույցի խայտառակ ցուցանիշների վրա:

NEWSPRESS.am