Ի՞նչ է ուզում Կարեն Կարապետյանը

Լուսանկարը՝ «Ֆոտոլուր»-ի

Վարչապետ Կարեն Կարապետյանը, երբ երկնքից ընկավ քաղաքապետարանի գլխին, հանրությունը սպասում էր նոր զարգացումների, փոփոխությունների ի վերջո, սակայն ի՞նչ արեց: Մարզաբնակները նրան հիշում են ամեն անգամ, երբ Երևանի կենտրոն գնալու փոխարեն գնում են արվարձաններ և երկրորդ տրանսպորտից օգտվելով՝ հասնում կենտրոն: Դրանից երթևեկությունը հաստատ չի բարելավվել, ոչ էլ մարզային տրանսպորտի գինն է փոխվել, եթե հաշվի առնենք, որ ճանապարհը կրճատվել էր: Ներկայիս վարչապետի նախկին քաղաքապետությունից մնաց «դրայվը»:

Երբ Կարեն Կարապետյանը դարձյալ ընկավ՝ այս անգամ վարչապետական աթոռին, էլի կային սպասելիքներ ամենահամառների շրջանում, որոնք սպասում էին որոշ փոփոխությունների՝ ոչ մեծամասշտաբ, այլ պարզապես:

Պարզվեց՝ ներկայիս վարչապետի հիմնական խնդիրը նրա PR-ն է և վերջ, նա ավելի հավակնոտ է, քան կարելի էր պատկերացնել. այն գործարար ու վճռական անձը, որին սպասում էին, պարզվեց՝ սեփական անձի գովազդատուն է:

Կառավարության տարբեր օղակներում, անգամ մամուլում, ի հայտ են գալիս փոքրիկ տեղեկույթներ, որ վարչապետի խոսքն ամեն տեղ չէ, որ անցնում է, նրա հանձնարարությունները ոչ միշտ են կատարվում, կատարվելուց էլ մատների արանքով են նայում գործերին:

Չմոռանանք, որ Doing Buisness-ի վարկանիշային աղյուսակում Հայաստանը «պատկառելի» հետընթաց է ապրել հենց Կարեն Կարապետյանի վարչապետության տարվա ընթացքում:

Ի դեպ, վարչապետն առանձնապես աչքի չի ընկնում բարեկրթությամբ՝ ինչպես առաջին հայացքից թվում է. արդեն գաղտնիք չէ, որ վարչապետը և բնապահպանության նախարար Արծվիկ Մինասյանը «չհարաբերությունների» մեջ են, և անգամ վարչապետը նրան չի բարևում:

Կառավարության նիստերին Արծվիկ Մինասյանը բնապահպանական խնդիրներին անդրադառնալիս մի քանի անգամ առարկել է վարչապետին, և հին խնդիրներ էլ կան այս երկու ֆիգուների կյանքում: Արդյունքում վարչապետը պարզապես խռով-խռով է խաղում իր կաբինետի անդամի հետ: Թեև Արծվիկ Մինասյանը դաշնակցական է, սակայն դա չի նշանակում, որ ՀՀԿ վարչապետը չպետք է խոսի դաշնակցական նախարարի հետ. ի վերջո կառավարություն է, ոչ թե մանկապարտեզ:

Այս ամենն ինչ-որ ավարտ կունենա 2018 թվականին, և թե այս անգամ ո՞ւր է ընկնելու Կարեն Կարապետյանը, դեռևս հայտնի չէ. շրջանառվում է մի քանի տեղեկություն, սակայն հստակ կարծես ոչինչ չկա:

Նախնական տեղեկությունն այն է, որ Կարեն Կարապետյանն ու Հովիկ Աբրահամյանը լինելու են վարչապետի տեղակալները, իսկ վարչապետ, ամենայն հավանականությամբ, Սերժ Սարգսյանը:

Սակայն հարց է, թե արդյոք Կարեն Կարապետյանը ցանկանո՞ւմ էր կամ է լինել վարչապետի տեղակալ, քանի որ դրախտից ընկնել դժոխք և ընդամենը ձեռքին ունենալ դժոխքի բանալիներ… երևի ավելի մեծ ակնկալիք ուներ, սակայն Կարեն Կարապետյանի համար խաղողը դեռևս խակ է:

NEWSPRESS.am