«Հրապարակ». ԱԱԾ-ն ներքին կարգով դեկաններին զգուշացրել է՝ պատրաստ եղեք ներքաղաքական զարգացումների

«Հրապարակ» թերթը գրում է.

«Մեր տեղեկություններով` հայրենի ԱԱԾ-ն ուշիուշով հետևում է ուսանողների բողոքի ցույցերին` կապված տարկետման օրենքի հետ, և ներքին կարգով զգուշացրել է դեկաններին, ուսխորհուրդների նախագահներին` պատրաստ եղեք ներքաղաքական զարգացումների:

Ըստ լավատեղյակ աղբյուրների` այս օրերին ոչ միայն ուսումնասիրվում է ցույցի կազմակերպիչների` «Ելք» դաշինքի պատգամավոր Արարատ Միրզոյանի ԱԺ օգնական Վահան Կոստանյանի, Հաց բերողին նվիրված ցույցերի կազմակերպիչ Դավիթ Պետրոսյանի, էլ առավել Սեյրան Օհանյանի թիմի` ՕՐՕ դաշինքի երիտթևի ղեկավար Մանուել Մանուկյանի վարքը, այլև ցույցերի էներգետիկան, զարգացման հնարավորությունները, որը, ըստ ԱԱԾ-ի, առայժմ բարձր չէ, բայց «աճման տենդենց ունի»։

Երեկ խորհուրդ են տվել ԵՊՀ պատասխանատուներին այլևս ու երբեք չփակել ֆակուլտետների դռները. «ԵՊՀ-ի ուսանողը սպեցիֆիկ է, դուռը փակեցիր, հակառակ էֆեկտ կտա»: Հիմա կողմերը խաղում են ժամանակի վրա։

Բանն այն է, որ երեքշաբթի մեկնարկելու է ԱԺ նստաշրջանը, «Զինապարտության մասին» օրենքը դրվելու է երկրորդ ընթերցման, իշխանությունները հույս ունեն, որ մինչ այդ ցույցերն ինքնուրույն կմարեն։ Ցույցի մասնակիցներն ու նրանց համախոհները փորձում են ուսանողական բունտին որոշակի քաղաքական երանգ տալ և տեղափոխել Բաղրամյան պողոտա` ԱԺ շենքի մոտ»:

Մանրամասները՝ թերթի այսօրվա համարում