Քաղաքականություն՝ Օհանյանատիկնոջ տեսքով

Պաշտպանության նախկին նախարար Սեյրան Օհանյանի տիկինը՝ Ռուզան Խաչատրյանը, կուսակցություն է բացում՝ «Արդար Հայաստան»:

Թե տիկին Խաչատրյանն ի՞նչ խութեր է հաղթահարել, մինչև ստացել է Սեյրան Օհանյանի տիկնոջ կարգավիճակը, միայն իրեն է հայտնի. պատառիկներ սպրդում են մամուլ, սակայն ո՞րն է ճիշտ, ո՞րն է սխալ. յուրաքանչյուրը մեկնաբանում է՝ ըստ տիկնոջ հանդեպ սիրո և ատելության:

Ապագայում հակասական զգացմունքներն է′լ ավելի են սրվելու, քանի որ տիկին Խաչատրյանը որոշել է քաղաքականություն խաղալ, իսկ ինչո՞ւ ոչ: Եթե նայենք, թե հատկապես տիկնանց կտրվածքով ովքեր են քաղաքականության մեջ, ապա կտեսնենք, որ նրանք այստեղ են միայն Ռիտա Սարգսյանի հովանավորությամբ կամ Սերժ Սարգսյանի թողտվությամբ: Այս ֆոնին Ռուզան Խաչատրյանը հաստատ գույն ու ծաղկաբույր կհաղորդի ՀՀ միապաղաղ անդեմ կանանց քաղաքականությանը:

Բույլ մը նայվածք, փունջ մը ժպիտ, և ահա Ռուզան Խաչատրյանը քաղաքականության մեջ է, երևի այս ճանապարհն ամենայուրօրինակն է, քան, օրինակ, ՀՀԿ տիկնանց մուտքը քաղաքականություն՝ անհայտ թունելներից, հայտնի հովանավորներով. հովանավորչությամբ, սակայն ոչ խելքամբ մեծամասամբ:

Իսկ որ ապագայում հետաքրքիր է լինելու, հաստատ, և միապաղաղ ՀՀԿ-ականությունը կճեղքվի… գույն, բույր, ծաղիկներ. կարճ ասած՝ ուրախ է լինելու:

Ժամանակին, երբ ՀՀ նախագահի աթոռի թեկնածուներից մեկի անունը ենթադրաբար Սեյրան Օհանյանն էր, Ռուզան Խաչատրյանն իր խաղերով նախ խախտեց ՀՀԿ տիկնանց անդորրը՝ զայրացնելով հայ տիկնանց՝ արդեն ո′չ երիտասարդ, ո′չ թարմ և ո′չ հավասարակշիռ կոհորտային, իսկ գունա-ծաղկա ետհարվածի ժամանակ վնասեց ամուսնու հեղինակությունը:

Արդեն ամուսնու հեղինակության հարցը չի քննարկվում. նա նախարար չէ, մնում է տիկնանց կոհորտան և ՀՀ քաղաքականությունը:

Իսկ ինչպիսի՞ն կլինի Ռուզան Խաչատրյան քաղաքական ֆիգուրը. հավանաբար՝ անկախ. շատերին իրենց տեղը կարող է ցույց տալ՝ վիրավորանքների, նաև հրապարակային դավադրությունների համար: Նրա՝ քաղաքականության կողքին լինելով՝ 2018 թվականը երևի թե ավելի հետաքրքիր, բազմաժանր և ծաղկագեղեցկություն կունենա, և հանրությունը տարբեր բախումների, ձայնա-ծաղկամարտերի պակաս չի զգա:

Այնպես որ՝ ոչ միայն գեղեցիկ քաղաքականությամբ, նաև քաղաքականության մեջ ծաղկա-գունային ֆոտոալբոմներով միապաղաղ գորշությունը կօծվի. լա՞վ է, թե՞ վատ, պարզ կլինի ծաղկաշղթաների կիրառման ժամանակ:

NEWSPRESS.am