Թանկյանի գրառումն ու երկարականջ կենդանու ականջներում հանգստացող նախարարները

Օրերս աշխարհահռչակ հայազգի ռոքեր, System Of a Down ռոք խմբի մեներգիչ Սերժ Թանկյանը ֆեյսբուքյան իր էջում գրառում է արել՝ կոչ անելով Հայաստանին հեռու մնալ գենետիկորեն ձևափոխված օրգանիզմների արտադրական ոլորտի «հսկա» հանդիսացող Monsanto ընկերության արտադրանքից:

Հայտնի է, որ ընկերությունը բույսերի բիոտեխնոլոգիաների ոլորտի համաշխարհային առաջատարն է: Այն արտադրում է գյուղատնտեսական նշանակության ապրանքներ՝ եգիպտացորենի, սոյայի, բամբակի՝ գենետիկորեն ձևափոխված սերմեր, թունաքիմիկատներ, ինչպես նաև աշխարհում ամենատարածված հերբիցիդը՝ «Ռաունդափը»-ը:

Թանկյանի խոսքով՝ կան բազմաթիվ ապացույցներ առ այն, որ Monsanto-ի հեղուկացիրները թունավորում են շրջակա միջավայրը՝ ոչնչացնելով մեղուներին և նրանց՝ գենետիկորեն ձևափոխված արտադրանքը վերջ է տալիս մաքուր, օրգանական սննդին: Դրանք վնասակար են առողջության համար ու ահավոր համ ունեն:

Հայտնի է, որ նոյեմբերի 1-ին ՀՀ-ում ԱՄՆ-ի դեսպանատունը կազմակերպել էր Հայաստանի գյուղատնտեսական ոլորտին ուղղված բիզնես համաժողով, որի նպատակն էր գործարար կապեր ստեղծել այդ ոլորտում ներկայացված հայկական և ամերիկյան Valmont և Monsanto ընկերությունների միջև:

Նշվում է, որ համաժողովին ներկա են եղել Valmont-ի ու Monsanto-ի ներկայացուցիչները, որոնք ցույց են տվել իրենց արտադրանքն ու պատմել մատուցվող ծառայությունների մասին: Բացի այդ, նրանք հետաքրքրվել են Հայաստանում բիզնես ծավալելու հնարավորությունների մասին:

Այս երկու իրադարձությունները հետևեցին մեկը մյուսին և կարելի է ասել, որ չլիներ Սերժ Թանկյանի գրառումը, Monsanto-ի մասին տեղեկություն այդպես էլ հանրությունը չէր ստանա: Ավելին՝ պարզվում է, որ այդ ընկերությունն արդեն 20 տարի գրանցված է Հայաստանում և գործունեություն է ծավալում:

Հայ երաժշտի գրառումից հետո Գյուղնախարարությունն ու Բնապահպանության նախարարությունն ուսումնասիրում են՝ հասկանալու, թե ինչ է արել ընկերությունն այս ընթացքում, ինչ հնարավոր ռիսկեր կան, ինչ սերմեր են ներկրում և մտադիր են սերմերի ներմուծման մասին օրենսդրական նախաձեռնություն սկսել: Իսկ եթե գրառումը չլինե՞ր:

Ի դեպ, ԳՆ ՍԱՊԾ պետ Իշխան Կարապետյանն էլ նշել է, որ «Մոնսանտո» ընկերության կողմից ներկրվող սերմերը կազմում են ընդհանուր ծավալի 1 տոկոսը և չի կարծում, որ այս պահի դրությամբ դա մեծ ռիսկ է պարունակում:

Բացի այդ, որոշել են, որ պետք է մոնիթորինգ իրականացվի, հաջորդ տարվա բյուջեի մեջ ներառված է ծրագիրը, կքննարկեն, կորոշեն, կմտածեն, կխորհեն և երկար-բարակ մտածելուց հետո իրենց որոշման մասին կհայտնեն:

ՀՀ-ում պետք է արգելվի տրանսգենային գյուղատնտեսությունը, որն այսօր խնդիր է, երկրներ կան, որոնք արգելում են գենետիկորեն ձևափոխված մթերքների ներկրումը, իսկ նման գյուղմթերքի մշակումը հողը վարակում է, և արդեն օրգանական գյուղմթերք հնարավոր չէ մշակել: Ըստ մասնագետների՝ Հայաստանում պղպեղը, լոլիկը և եգիպտացորենն են պարունակում ԳՁՕ: ՍԱՊԾ-ն այս ուղղությամբ որևէ քայլ չի ձեռնարկել, չկան լաբորատորիաներ՝ խոր ստուգումներ իրականացնելու, դրան գումարած՝ կրճատվել է 2018 թվականին գիտությանը տրվող բյուջետային գումարները:

Ուստի զարմանալի չէ, թե ինչու է մեր ժողովուրդն այդքան հիվանդ և հիվանդանոցներում մշտապես հերթեր են. հանրությունը ոչ առողջ սնունդ է օգտագործում՝ արդյունքը հիվանդությունների աճն է:

Նախարարություններն էլ հայտնի երկարականջ կենդանու ականջներում հանգստանում են:

NEWSPRESS.am