Առողջապահության նախարարության աշխատակիցների աղջիկներն առաջինը կպատվաստվեն գարդասիլով. Անահիտ Հայթայան

Արդեն մի քանի օր է՝ համացանցը ողողվել է կոչերով, որոնք ուղղված են ՀՀ կառավարության հերթական որոշման դեմ: Մասնավորապես, ՀՀ առողջապահության նախարարությունն ընդունել է որոշում, որի համաձայն՝ դեկտեմբերի 2-րդ շաբաթում Հայաստանի դպրոցներում կսկսվեն 13-ամյա աղջիկների պատվաստումներ՝ գարդասիլով:

Սա բավականին մեծ աղմուկ է բարձրացրել, քանի որ մտավախություն կա, թե այն կարող է քաղցկեղ առաջացնել:

Ֆեյսբուքյան օգտատերերն այս առթիվ իրենց մտահոգությունն են հայտնել. եթե դա ճիշտ է՝ ինչու առողջապահության նախարարությունը չի արձագանքում:

«Ո՞վ է ասել, թե չենք արձագանքել. Գարդասիլի մասին համացանցում եղած նյութերը գիտական հիմնավորում չունեն: Մինչ դեռ մեր կայքէջում կան համապատասխան նյութեր, որոնք մանրամասնորեն տալիս են պատվաստման և դրա հետևանքների նկարագիրը»,-NEWSPRESS.am-ի հետ զրույցում ասաց ՀՀ առողջապահության նախարարի մամուլի քարտուղար Անահիտ Հայթայանը:

Նա նկատեց, որ նախարարությունը խնդրին դեռ էլի կանդրադառնա, սակայն հարկ համարեց մինչ այդ նշել, որ Առողջապահության նախկին նախարար Արարատ Մկրտչյանը, ով առողջապահական ոլորտում իրականացվող ցանկացած նախաձեռնության դեպքում մշտապես աչքի է ընկել քննադատական մոտեցմամբ, այս անգամ հակառակ տեսանկյունից է հանդես եկել. Մկրտչյանը ողջունել է նախաձեռնությունը:

«Նախարարությունում մեր ազգի թշնամիները չեն. աշխարհի 71 երկրում նման պատվաստում արվում է, բայց ի՞նչն է պատճառը, որ մարդիկ նման հայտարարություններով հանդես են գալիս՝ չեմ կարող ասել: Մարդիկ նույնիսկ լավ գործերն են որպես վատ ներկայացնում: Չգիտեմ՝ ո՞ւմ է պետք, որ նման արձագանք գտնի այս պատվաստման լուրը»,-ասում է Անահիտ Հայթայանը:

Նա վստահեցնում է, առողջապահության նախարարության բոլոր աշխատողները պատրաստ են առաջինն իրենք իրենց աղջիկներին ներարկել այդ պատվաստանյութը:

«Մեր բոլոր աշխատակիցներն, ովքեր ունեն այդ տարիքի աղջիկներ, հայտարարել են, որ իրենց աղջիկները պատվաստվողներից առաջինն են լինելու, դա լինելու է բոլորի աչքի առաջ, ու բոլորը դա կտեսնեն»,-եզրափակեց Անահիտ Հայթայանը:

Արմինե Մկրտումյան