«Կառավարությունն աշխատում ա քցելու վրա, օրենք չկա». հաշմանդամ օդաչուներ (ֆոտո)

Հաշմանդամ օդաչուներն անցած տարիների պայքարի ընթացքում եկել են մի եզրահանգման. կառավարությունը «քցող է»:

«Հայաստանի կառավարությունն աշխատում է ո՛չ թե ժողովրդի հարցերը լուծելու, այլ նրանց քցելու համար: Մտածում են՝ ո՞նց անեն, որ էս խմբի, էն խմբի մարդկանց քցեն ու գնան»,- NEWSPRESS.am-ի հետ զրույցում նեղսրտած ասաց օդաչուներից մեկը:

Ժողովրդին «քցողների» շարքում օդաչուները նշում են նաև Արդարադատության նախարար Դավիթ Հարությունյանի անունը, ում պաշտոնավարման օրոք էլ առաջ եկավ իրենց խնդիրը:

«Կառավարությունն աշխատում ա քցելու վրա, չկա օրենք, եղած օրենքներն էլ ժողովրդի օգտին չեն գործում»,-նշեց մեր զրուցակիցը:

2001 թ. Իրանում «Հայկական ավիաուղիներին» պատկանող 3ԱԿ-40 օդանավի զոհված օդաչուի մայր Ջեմմա Հովհաննիսյանն էլ նշեց, որ իր համար տհաճ է ամեն անգամ գալ կառավարության դիմաց կանգնել և արժանանալ կառավարության արհամարհանքին:

«Ախր սա ի՞նչ երկիր է, ամեն օր նոր օրենք են հանում ու ժողովրդին ավելի նեղում: Էնքան վատ է ամեն ինչ, որ մեկ-մեկ իմ ցավն էլ եմ մոռանում ու մտածում՝ էս ու՞ր հասանք: Ի՞նչ են ուզում մեզնից, բա ժողովուրդը մեղք չէ՞: Եկել, էս տարիքիս կանգնել եմ էստեղ, որ իմ հասանելիք փողը տան, բա ես սրա՞ն էի արժանի: Որդուս կորցրի, կառավարությունն էլ սենց արհամարհում է: Գոնե դուրս գա մեկը, մի բան ասի»,-ասում է 81-ամյա Ջեմմա Հովհաննիսյանը:

Որդու մահից հետո նրա ընտանիքին նպաստ է նշանակվել, որը 2008 թվականից հետո չեն ստացել:

Հիշեցնենք, որ «Հայկական ավիաուղիներ» ընկերության վետերան օդաչուներն իրենց առողջությանը վնաս պատճառվելու դիմաց ավելի քան 10 տարի փոխհատուցում չեն ստանում: