Թունել Հակոբը «լռվել է» թունելում

Լուսանկարը՝ «Ֆոտոլուր»-ի 

ԱԺ սոցիալական հարցերի և առողջապահության մշտական հանձնաժողովի նախագահ, ՀՀԿ-ական պատգամավոր Հակոբ Հակոբյանը հաշվել է, որ տարեկան Հայաստան է մտնում 500 մլրդ դրամ գումար, և դա բավարար պայման է, որ աղքատությունը վերանա, սակայն աղքատությունը, չգիտես ինչու, համառորեն չի վերանում. այն ամենապարզ հաշվարկներով կազմում է 30 տոկոս:

Աղքատության հաշվարկի տարբեր մեթոդներ կան: ՀՀ-ն ընտրել է այն մեթոդը, ըստ որի, աղքատությունը 30 տոկոս է, այսպես հարմար է, սակայն, տարբեր հաշվարկներով, ՀՀ-ում այն հասնում է մինչև 70 տոկոսի. փոխել մեթոդաբանությունը և ազատվել 40 տոկոս աղքատներից:

Հակոբ Հակոբյանը, ով ավելի հայտնի է «Թունել» Հակոբ անվանումով, կարծիք է հայտնել, որ աշխատավարձերի, նպաստների և թոշակների չբարձրացնելը դեռ ցուցիչ չէ, որ երկրում աղքատություն է, իսկ, ըստ նրա, միջազգային կազմակերպություններն ինչո՞ւ չեն հաշվում, որ Հայաստանում աշխատավարձերն աստղաբաշխական բարձր են: Երևի իրեն թվում է, թե բոլորի աշխատավարձերն իր աշխատավարձի չափ են. չմոռանանք, որ նա (այժմ էլ որդին) «թունելում» են Արփա-Սևան թունելը և դեռ տարիներ «կթունելեն», միլիոնների հետ գործ ունեն, իսկ թունելի վերանորոգումը յոթ սար և յոթ ձոր այն կողմ է:

Իսկ թե ինչպե՞ս է Թունել Հակոբը ՀՀ-ում աստղաբաշխական բարձր աշխատավարձեր տեսել՝ մնում է զարմանալ մարդու խորաթափանցելիության վրա:

Բացի այդ, նա հաշվարկել է, որ ՀՀ-ում աղքատության վերացման համար պետք է 500 մլրդ դրամ, եթե լինի այդ 500 մլրդ դրամը, ապա ՀՀ-ն աղքատությունը կհաղթահարի: Իհարկե, չի մոռանում, թե աղքատների, երկրի, ճանապարհների, ոռոգման համակարգերի, կառավարման, օրենսդրական փոփոխությունների համար ՀՀ են մտել աստղաբաշխական գումարներ և դրանք ոչ թե ուղղվել են աղքատության վերացմանը կամ նմանատիպ գործերի, այլ իշխանական գրպանները:

Հակոբ Հակոբյանն իշխանության աչքի գերանը թողել, ժողովրդի աչքի փուշն է տեսնում:

Բացի այդ, նա վատ միտում չի տեսնում, որ մարդկանց կրճատում են: Որ այդքան խելոք է Հակոբյանը, կարո՞ղ է առաջարկել՝ ԱԺ-ի անպիտան պատգամավորներին, ուռճացված աշխատակազմը, բազմաթիվ ու բազմապիսի գործավարուհիներին, պաշտոնյաների սիրուհիներին, տարբեր երկար ու կարճ փեշերին կրճատեն ԱԺ-ից, որոնք տարրական գիտելիքների չեն տիրապետում և ԱԺ են ընկել, որովհետև սրա-նրա դուստրն են կամ սրա-նրա 7-րդ ժամկետնանց սիրուհին:

Երկիրը պահում է անգործունակ ԱԺ-ն, պատգամավորներին հետպատգամավորական հսկայական գումարներ է վճարում, ԱԺ-ն հնարավորություն է տալիս տեղավորվել «գիտնական»-բանակից թռածներին, որոնց աշխատանքները գրել է պողոս-պետրոսը:

Զգացվում է, չէ՞, որ իշխանական աչքի գերանը գերան է, իսկ ինչո՞ւ այսքանը Հակոբ Հակոբյանի աչքին չի երևում, գուցե թունելի՞ց է կամ թունելո՞ւմ է նա մնացել:

Չմոռանանք, որ նրա ընտանիքը խցկվել-մնացել է Հայոց թունելում. միլիոններ, պետական գումարներ, որդին բանակից թռչկոտել է: Ճիշտ կլինի, որ Հակոբ Հակոբյանը սեփական աչքի գերանն էլ տեսնի, քան եզի տակ հորթ ման գա:

NEWSPRESS.am