Ժողովրդին չեք հարգում, Սերժ Սարգսյանին է՞լ չեք հարգում

Այժմ 2017 թ. նոյեմբերն է, և արդեն հայտնի է, որ աշխատավարձերը, նպաստները, թոշակները 2018թ. չեն ավելանալու, պատկան ատյանից հայտնել են, որ տնտեսական աճի հաշվին պետք է բարձրացում լինի: Ըստ այդմ՝ ենթադրվում է, որ ՀՀ-ն 2017 թվականին ընդհանրապես տնտեսական աճ չի ունեցել, տնտեսական աճ չի լինելու նաև 2018թ., քանի որ բարձրացումներ նախատեսված չեն:

Ազգային ժողովում Ֆինանսների նախարար Վարդան Արամյանը ոչ թե առաջ է նայում, քանի որ ապագայում ոչ մի դրական տեղաշարժ չի լինելու, այլ՝ հետ. հիշե′ք, մարդի′կ, որ 2012 թվականից հետո նվազագույն աշխատավարձը 70 տոկոսով ավելացել է: Մե խինդ, եմ ուրախություն ու տոնախմբություն: Կեցցե՛, Վարդան Արամյանը:

Իսկ գուցե նա տեղյա՞կ չէ, որ ՀՀ նախագահը խոստացել էր, որ 2017 թ. նվազագույն աշխատավարձը պետք է 90 հազար դրամ լիներ, և ԱԺ-ում զբաղված է անցյալի աչքակապություններով:

Ի դեպ, նոր թեմա են մոգոնել, աշխատավարձերի աճը պետք է լինի տնտեսական աճի շրջանակներում: Հիշեցնենք, որ 2018թ. համար կանխատեսվում է 4-4,5 տոկոս տնտեսական աճ, իսկ Հայաստանում ավելի ցածր տնտեսական աճի ժամանակ էլ են բարձրացումներ եղել:

Հաջորդ «բումն»՝ այս անգամ փոխվարչապետ Վաչե Գաբրիելյանից, լինելով խելացի տնտեսագետ՝ հաշվարկել է, որ «պետական պարտքը կառավարելի է»:

Ի դեպ, այսպես էին ասում, երբ պետական պարտքը 2 մլրդ դոլար էր, 2,5 մլրդ դոլար, 4 մլրդ դոլար և անգամ 6 մլրդ դոլար: Ասել կուզի, որ 10 մլրդ դոլար պարտք էլ որ երկիրը ունենա՝ բյուջեից կվճարենք, կարևորը մի խիճիթ կառուցեն, պաշտոնյաների զորագունդը գնա բացում անելու, և կլինի մանկան զվարճանք և հեռուստացուցադրություն: Դե իհարկե, եթե ամեն տարի հսկայական գումարներ են գնում պարտքի սպասարկման, աշխատավարձերն ինչպե՞ս բարձրացնեն:

Ակնհայտ է, որ իշխանություններն ընկել են ցուցամոլության ետևից՝ «դիփ խաբում ին ու խաբում»: Որևէ խթան չկա՝ բարելավվելու մարդկանց կենսակերպը, իշխանական օղակներում իրենք իրենց աշխատավարձերը բարձրացնում են, լրացուցիչ գումարներ ստանում են, պարգևավճարներ՝ նույնպես, գործուղումները կան ու կան:

Կյանքը երջանիկ, ապրուստը՝ ձրի:

Իսկ ի՞նչ անեն ոտքի տակ ընկնող ժողովրդի հետ՝ մնում է հին աչքակապությունը:

Ի դեպ, հիշեցնենք, որ դեռևս 2013թ. ՀՀ նախագահ Սերժ Սարգսյանը ԿԳՆ աշխատակազմի հետ հանդիպման ժամանակ հայտարարել էր, որ 2017թ. ՀՀ-ում նվազագույն աշխատավարձը կլինի 90 000 դրամ: Բացի այդ, ՀՀ նախագահը նաև հայտարարել էր, որ 2014 թվականից պետությունն անցնում է աշխատավարձերի ամենամյա բարձրացման գործելաոճին։

Գաղտնիք չէ, որ ո′չ նվազագույն աշխատավարձն է 90 հազար դրամ, ո′չ էլ ամեն տարի աշխատավարձերի բարձրացում կա: Նախատեսվում էին պարգևատրումներ, որն, ինչպես գիտենք, արդեն գոյություն չունի: Ի դեպ, սա կառավարության ծրագրի մի մասն էր:

Լավ, ժողովրդին չեք հարգում՝ հասկացանք, երկրի նախագահին է՞լ չեք հարգում և նրա խոսքն ու խոստումները գետնո՞վն եք տալիս: Անգամ ոչ քաղաքակիրթ երկրում երկրի նախագահի խոսքը գետնով տալը պատիժների սանդղակ է նախատեսում, որ Հայաստանում էլ մեկ-երկուսին կախաղան բարձրացնեն, մնացածները երկրի նախագահի խոսքը երևի կհարգեն:

NEWSPRESS.am