«Ребята, давайте жить дружно». Ասլանը կատու է դարձել

Վանաձորի քաղաքապետ Մամիկոն Ասլանյանի տակ աթոռը երերում է, բայց ոչ թե իր ծանրության, այլ զոռբայության հետևանքով:

Օրերս ՍԴ որոշմամբ՝ հակասահմանադրական էր ճանաչվել «Տեղական ինքնակառավարման մասին» ՀՀ օրենքի 64-րդ հոդվածի 3-րդ մասը: Այսինքն՝ ՍԴ-ն հայտարարել էր, որ Վանաձորի ավագանու հրավիրած նիստերն ու նիստերի ընթացքում կայացրած որոշումները հակասահմանադրական են:

Իհարկե, մարդու նպատակասլացությունն ու համառությունը՝ իր նշանակետին հասնելու համար, կարելի է գնահատել, սակայն սա այդ դեպքը չէ:

Այստեղ նպատակն ու համառությունն անցել են բոլոր սահմանագծերը: Ինչպես ժողովուրդն է ասում, «Ասլանը վախենալի զոռբթուենով կըռիվ կընե»:

«Լուսավոր Հայաստան» կուսակցության ղեկավար Էդմոն Մարուքյանը երևույթը հե՛նց սկզբից որակեց զոռբայություն: Զոռբայությունը բռնությունն է. այս դեպքում, թերևս, Ասլանյանը բռնությամբ փորձում է պահել աթոռն իր տակին: Սա նրա համար արդեն «պրինցիպի» հարց է դարձել, քանի որ հենց սկզբից նա փորձում էր ցույց տալ, որ Հանրապետականի դեմ խաղ չկա, ու հիմա, կարծես, ՍԴ-ն այդ խաղաքարտերը խառնեց: Ասլանյանի համար սա անակնկալ որոշում էր:

Մեր տեղեկություններով՝ նա իր մտերիմների շրջանում նույնիսկ ասել է, թե «ինչ ուզում ա, թող Մարուքյանն անի, մեկ ա՝ ես եմ մնալու քաղաքապետ: Սահմանադրական դատարանը չի կարա հակասահմանադրական համարի նիստերը, ես քվորում ապահովել եմ»: Հարցին, թե այսինքն՝ շարունակե՞լու է աշխատանքը բնականոն հունով, Ասլանյանը ծիծաղելով պատասխանել է, թե «բա ինչ պետք ա անեմ»: Իսկ նրա թիմակիցներից մեկը նույնիսկ հայտնել է, թե «մեր դեմ խաղ չկա»:

Ու թեև Սահմանադրական դատարանի որոշումը հստակ է, Վանաձորի քաղաքապետը, իր թիմակիցների հետ, փորձում է սեփական ձևակերպմամբ մեկնաբանել այն ու համոզել, որ իրենց ձևակերպումն ավելի ճիշտ է:

Մի կողմից՝ հնարավոր է, որ ՍԴ-ի որոշումն իսկապես ճիշտ չի ընկալվել, քանի որ ցանկացած որոշում, իրավական տեսանկյունից, ունի սողանցքներ: Ու հնարավոր է իշխող կուսակցության ներկայացուցիչն արդեն ներքին կարգով գիտի, որ այդ սողանքն իր օգտին է լինելու: Եվ ամեն ինչ հանգիստ ու ծիծաղով է մեկնաբանում, թեև որոշման տեքստը դեռ չի տեսել:

Մյուս կողմից էլ՝ չի բացառվում, որ նա, այնուամենայնիվ, աթոռը կորցնելու մտավախություն ունի, քանի որ, ինչպես շրջանառվում է մամուլում, Մամիկոն Ասլանյանը որոշել է, ինչպես ասում են, «ափալ-թափալ» վաճառել համայնքի սեփականություն հանդիսացող հողատարածքներ, քանի դեռ իր պաշտոնին է:

Ի՞նչ սկզբունքով և ո՞ւմ թույլատվությամբ՝ չի քննարկվում: Հատկապես, երբ համայնքի սեփականության օտարման որոշումը կայացնում է ավագանին, իսկ Վանաձորի պարագայում՝ այդ ավագանին արդեն իսկ զրկված է որոշումներ կայացնելու իրավունքից: Այսինքն՝ Վանաձորի ավագանու կայացրած ցանկացած որոշում հակասահմանադրական է:

Բայց քաղաքի թալանն սկսելուց զատ, Ասլանյանը նոր մոտեցմամբ է նաև հանդես եկել, որը հայտնի «Լեոպոլդ» կատվի մասին մուլտն է հիշեցնում, որտեղ մկները կատվի դիմաց առյուծ կտրելուց հետո, սպիտակ թաշկինակ են բարձրացնում, թե «Ребята, давайте жить дружно»:

Հիմա էլ Ասլանյանը ֆեյսբուքյան իր էջում ուղերձ է հղել նիստերը բոյկոտող խմբակցություններին, թե.

«Վանաձոր համայնքի ավագանու ԼՀԿ,ՀՎԿ և ԲՀԿ խմբակցությունների հարգելի անդամներ. Վանաձոր քաղաքի առջև ծառացած խնդիրները համատեղ հաղթահարելու, քաղաքի զարգացման բնականոն ընթացքն ապահովելու, մասնակցային կառավարում իրականացնելու և ի շահ Վանաձորի՝ կրկին անգամ առաջարկում և հորդորում եմ մասնակցել ավագանու նիստերին և մաս կազմել քաղաքի կառավարմանը… Վանաձորն առավել՝ քան հիմա, կարիք ունի սրտացավության և իրական հոգատարության…»:

Հարկ է նկատել, որ Վանաձորը ոչ միայն հիմա, այլ միշտ է կարիք ունեցել սրտացավության: Իսկ կոչն ավելի շատ ուղղված է «խմբակցությունների հարգելի անդամներին», զուտ նրա համար, որ բոլորով հավաքվեն ու բռնեն Ասլանյանի տակ երերացող աթոռի ոտքերից:

NEWSPRESS.am