Լո-լո-լո -Հյուսիս-Հարավ- բլա-բլա-բլա

«Հյուսիս-հարավ ճանապարհային միջանցքի ներդրումային Ծրագիր 2 և Ծրագիր 3»-ն ուշանում են. առաջարկում են վարկի մասնահանման վերջնաժամկետը երկարացնել: Կապի, տրանսպորտի և ՏՏ փոխնախարար Արմեն Խաչատուրյանն ԱԺ-ում փորձել է մեկնաբանել ուշացման պատճառը:

Լո-լո 1:

Տրանշ 2-ի ազդեցության գոտում գտնվում են 16 համայնքներ, և օտարման են ենթակա 935 հողատարածքներ, որի 15%-ի սեփականության իրավունքը դատական որոշումների հիման վրա է որոշվում: Այդ դատական որոշումների հետաձգման համար եղել են օբյեկտիվ պատճառներ՝ կապված սեփականատերերի՝ ՀՀ-ում չլինելու, ժառանգության իրավունքի իրացման կամ ֆինանսների փոխհատուցման անհամաձայնության հետ:

Բլա-բլա 1:

Տրանշ 3-ի շրջանակներում հողերի օտարման և տարաբնակեցման ծրագրով ազդեցության գոտում գտնվում են 12 համայնքներ, կան 110 հողատարածքներ և 20 դատական գործեր:

Այստեղ ևս բնակչությունը զանգվածաբար արտագաղթել է, և այժմ ընկել մոլորակով մեկ սեփականատերերին են փնտրում:

Լո-լո-բլա-բլա:

Բացի այդ, հայտնաբերվել են պատմամշակությաին կոթողներ, որոնք խանգարում են ճանապարհը կառուցելուն:

Հիշեցնենք, որ Երևանի Հանրապետության հրապարակի տակ գտնվում է մշակութային շերտ. այն հողով լցվեց և փակվեց:

Թեև Հյուսիս-հարավը նախատեսում է Վրաստանով մայրուղու շարունակություն դեպի ծով, սակայն Վրաստանը իր տարածքում որևէ քայլ չի ձեռնարկել, ընդհակառակը՝ ավարտին հասցվեց Բաքու-Կարս երկաթգիծը: Ակներև է, որ Վրաստանը շահագրգռված չէ, որ հատկապես Ջավախքի տարածաշրջանում որևէ զարգացած ճանապարհային ուղիներ կառուցվեն:

Ի դեպ, «Հյուսիս-Հարավ» ավտոճանապարհի կառուցման սկզբից մինչև 2017թ. օգոստոսի 1-ն ընկած ժամանակահատվածում ծախսվել է շուրջ 150.3 մլն ԱՄՆ դոլար և 23,14 մլն եվրո գումար, և կառուցապատվել է 31 կմ ճանապարհ: Հետո, իհարկե, փորձեցին խմբագրել, թե հատկապես ինչպես է գումարները ծախսվել, բայց ուլին քթոցի տակ չես թաքցնի:

Թեև Տրանսպորտի, կապի և ՏՏ նախարարությունը, «Հյուսիս-Հարավ ճանապարհային միջանցք» ՊՈԱԿ-ը փորձում են ամեն կերպ հերքել, թե յուրացումներ են եղել, իսկ ճանապարհի կառուցման ձգձգումները կապված են եղել բանակցությունների ուշ սկսման կամ պատմամշակութային կոթողների հետ, ակնհայտ է և արդեն գաղտնիք չէ, որ այս մայրուղու կառուցմամբ ոչ ոք արդեն հետաքրքրված չէ: Մնացել է ճանապարհից հերթական միլիոնները գրպանել, որը և տարբեր փուլերում արվում է, թեև պատասխանատուն նախարարությունն է, սակայն ծրագրի հետևում տարբեր մարդիկ են կանգնած, որոնք չեն էլ թողնում, որ փողը նախարարությունում փորձեն գրպանել:

Ի դեպ, դեռևս 2013թ. Վերահսկիչ պալատն էր գրել չարաշահումների մասին, այնպես որ՝ պարզամտորեն հերքում են, որպեսզի հերքում լինի: Չմոռանանք, որ ՀՀԿ պատգամավոր Գագիկ Մինասյանն ընդունել էր, որ կառուցման փուլում չարաշահումներ եղել են, սակայն նախարարությունը և պատկան ՊՈԱԿ-ը ժխտում են չարաշահումները: Պարզապես աջ ձեռքը չգիտի, թե ինչպես է գողանում ձախ ձեռքը:

NEWSPRESS.am