Ասլանյանի և Բիշարյանի համբույրի գինը. ՀՎԿ-ն ու Վանաձորի քաղաքապետը հուշագիր են ստորագրել

Ասում են՝ «Կարմիր կովը կաշին չի փոխի»: «Օրինաց երկրի» դեպքում հակառակն է եղել. կաշին փոխվել է՝ դառնալով «Հայկական վերածնունդ», բայց պարունակությունը նույնն է մնացել: Կուսակցության ղեկավար Արթուր Բաղդասարյանի ղեկավարած քաղաքական թիմի անդամները շարժվում են իրենց առաջնորդի հոգեբանությամբ՝ «որտեղ հաց՝ այնտեղ կաց»:

Վանաձորյան ՏԻՄ ընտրություններից անմիջապես հետո, երբ սկսեցին շրջանառվել խոսակցություններ, թե ավագանու ընդդիմադիր անդամներից առնվազն երկուսը «ծախվել են», կասկածները ո՛չ ավել, ո՛չ պակաս գնացին «Հայկական վերածնունդ» կուսակցության անդամների վրա: Հատկապես Մամիկոն Ասլանյանի և Հեղինե Բիշարյանի հայտնի համբույրից հետո. այն որակվեց նույնիսկ որպես «Հուդայի համբույր»:

Ու թեև երկու կողմերը այդ մասին կասկածներն իրենց կցկտուր հայտարարություններով փորձեցին փարատել, սակայն փաստն այն է, որ այսօր հենց «Հայկական վերածնունդ»-ը արձագանքեց Վանաձորի քաղաքապետի «SOS»-ին՝ օգնության կանչին:

Վերածնված օեկ-ցիները համագործակցության հուշագիր են ստորագրել քաղաքապետի հետ՝ փրկելով նրան աթոռից վայր ընկնելու վտանգից:

Մամիկոն Ասլանյանն այդ մասին ֆեյսբուքյան իր էջում գրել է.

«Երեկ կոչով դիմել էի Վանաձոր համայնքի ավագանու խմբակցություններին՝ ավագանու նիստերին մասնակցության և մասնակցային կառավարման սկզբունքից ելնելով՝ կառավարման մաս կազմելու հորդորով. Իմ կոչին արձագանքել է Վանաձորի ՀՎԿ տարածքային կառույցի ղեկավար և ավագանու անդամ Արկադի Փելեշյանը, որի հետ էլ կնքել ենք համագործակցության հուշագիր»։

Նկատենք, որ «Հայկական վերածնունդ»-ը քաղաքապետի գեղեցիկ աչքերի համար չէ, որ ընդառաջ է գնացել և ապահովել նրա ավագանու նիստի 17 ձայնը: Ըստ որոշ լուրերի, համաձայնությունը տեղի է ունեցել, մեղմ ասած, «առնեմ-ծախեմ» շուկայական հարաբերությունների շրջանակում. ՀՎԿ տարածքային կառույցի ղեկավար և ավագանու անդամ Արկադի Փելեշյանը հավակնում է  փոխքաղաքապետի պաշտոնին:

Ահա Բիշարյանի և Ասլանյանի համբույրի գինը: