Վանաձորի քաղաքապետի և ՀՎԿ միջև ստորագրված հուշագրով բացահայտվեցին «դավաճանները»

Վանաձորի քաղաքապետի և ՀՎԿ-ի միջև ստորագրված հուշագիրը ցույց տվեց, թե ովքեր էին խախտել նախնական պայմանավորվածություններն ընտրությունների ժամանակ։ Այս մասին այսօր ԱԺ ճեպազրույցների ժամին նշեց ԱԺ «Ելք» խմբակցության ղեկավար Նիկոլ Փաշինյանը:

Նրա խոսքով՝ այդ «ամուսնությամբ» ՀՎԿ-ն փորձում է մահացածին կենդանություն տալ, քանի որ ՍԴ որոշմամբ, դե յուրե արձանագրվեց Վանաձորի ավագանու մահը:

«Եթե ՀՀԿ-ն Վանաձորի ավագանին քնած դշխուհին է, «Հայկական վերածնունդն» իր համբույրներով կարող է փորձել նրան վերակենդանացնել, բայց տվյալ դեպքում մահացած դշխուհու հետ գործ ունենալն ու նրան վերակենդանացնելը դժվար է։ ՀՎԿ-ի քաղաքական մահը մենք շուտ էինք արձանագրել, բայց հիմա ՀՀ-ում այլևս նման քաղաքական ուժ գոյություն չունի, և հիմա դրա մասին նույնիսկ ստորագրված հուշագիր կա», – նշեց Փաշինյանը՝ հավելելով, որ սա «զոռբայության» նման մի բան է, քանի որ ավագանին, ըստ էության, նիստեր չի արել:

«15-ով հավաքվել են, ջան ասել, ջան լսել»,-նկատեց Փաշինյանը:

Խմբակցության քարտուղար Գևորգ Գորգիսյանն էլ նշեց, որ ՀՎԿ-ի նման որոշումն իր համար անակնկալ չէր:

«Ի վերջո հանրության համար բացահայտվեց, թե ովքեր են այն մարդիկ, ովքեր իրենց երդումը չէին կատարել քաղաքապետի քվեարկության ժամանակ ու քվեարկել էին Վանաձորի գործող քաղաքապետ Մամիկոն Ասլանյանի օգտին»,-ասաց պատգամավորը՝ տեղեկացնելով, որ դիմելու են կառավարությանը՝ ՍԴ որոշումն իրականացնելու պահանջով: