Անգելա Մերկելը հնարավոր է չկարողանա ընտրվել Գերմանիայի կանցլեր

Գերմանիայի կանցլեր Անգելա Մերկելի կոալիցիա ստեղծելու բոլոր ջանքերը ջուրն են ընկել․ այս մասին հայտնում է BBC լրատվական գործակալությունը։ Կասկածի տակ է հայտնվում Մերկելի՝ չորրորդ անգամ կանցլեր ընտրվելու հեռանկարը: Ազատ դեմոկրատական կուսակցությունը հրաժարվել է Մերկելի կուսակցության հետ կոալիցիա կազմել, իսկ կանցլերին մնացել է երկու տարբերակ՝ կամ համագործակցել փոքրամասնություն կազմող «Կանաչների» հետ կամ նոր ընտրություններ նշանակել: Այն, որ Մերկելը չի կարող կոալիցիոն կառավարություն կազմել, սասանում է նրա հեղինակությունն ինչպես Գերմանիայում, այնպես էլ Եվրոպական միությունում, որտեղ Մերկելը գլխավոր խաղացողներից է և մեծ դերակատարում ունի Ռուսաստանի դեմ պատժամիջոցների կիրառման ու Հունաստանի ճգնաժամի լուծման գործում:

Այս տարվա սեպտեմբերին տեղի ունեցած ընտրություններին Անգելա Մերկելի գլխավորած «Քրիստոնյա-դեմոկրատական» կուսակցությունը վատագույն արդյունքն է ցույց տվել 1949 թվականից ի վեր, իսկ նրանց նախկին կոալիցիոն գործընկեր «Սոցիալ- դեմոկրատական» կուսակցությունը կորցրել է ձայներն ու անցել ընդդիմադիր դաշտ: Իսկ նրանց ձախողման հիմնական պատճառ է հանդիսացել «Այլընտրանք Գերմանիայի համար» ծսյրահեղական ազգայնական կուսակցության գրանցած աննախադեպ հաջողությունն ընտրությունների ժամանակ:

Շատերի կարծիքով ազգայնականների այս հաջողությունը կապված է Մերկելի՝ միլիոնավոր փախստականներին Գերմանիայեւմ բնակեցնելու քայլը: Միգրացիոն քաղաքականության շուրջ անհամաձայնությունը հիմնական պատճառն է հանդիսացել, որ Մերկելն այդպես էլ չի կարողանում քաղաքական կոալիցիոն գործընկերներ գտնել: