Քնի խանգարումն ու դիետաները կանանց մոտ առաջացնում են անպտղություն․ պարզաբանում է գինեկոլոգը

21-րդ դարում կանանց անպտղությունը կազմում է 80 տոկոսից բարձր, որը դարաշրջանի ամենակարևոր խնդիրներից մեկն է։ Գիտնականներն ու բժիշկները մինչ օրս առաջ են քաշում նոր վարկածներ ու պատճառներ, որոնք տղամարդկանց ու կանանց մոտ առաջացնում են անպտղություն։

NEWSPRESS.am-ի հետ զրույցում մանկաբարձ-գինեկոլոգ Հռիփսիմե Թորոսյանը նշեց, որ գինեկոլոգները հիմա առնչվում են 90-ականներին ծնված աղջիկների հետ, որոնց շրջանում մեծ տոկոս է կազմում անպտղությունը։

«Այդ թվականներին ծնված աղջիկները տեսել են երկրաշարժ, պատերազմ, սով, մութ ու ցուրտ տարիներ, որն էլ իր մեծ ազդեցությունն է թողել։ Այդ թվականներին ծնված աղջիկներն ունեն նյարդային լուրջ խնդիրներ, դրա համար էլ նրանց մոտ բարձր է անպտղության ցուցանիշը։ Նյարդային խնդիրների առաջացման ամենակարևոր պատճառները սոցիալական միջավայրն է ու կենցաղը»։

Գինեկոլոգն ընդգծեց, որ Հայաստանն աշխարհի այն երկրներից է, որտեղ մարդիկ օգտագործում են հիմնականում օրգանական սնունդ, սակայն այդ ամենի հետ մեկտեղ պետք է փաստել, որ մեզ մոտ աղջիկները խախտում են սննդակարգը, որը նույնպես առաջացնում է անպտղություն։

hripsime torosyan

«Քանի որ մեր աղջիկները հետևում են համացանցում գովազդվող դիետաներին և ուշադրություն չեն դարձնում իրենց սննդակարգին, այդ իսկ պատճառով տարիներ հետո կանգնում են անպտղության խնդրի առաջ։ Սրան կարելի է գումարել նաև խմիչքի ու ծխախոտի օգտագործումը, որն ակտուալ է դարձել 21-րդ դարում։ Մեծ նշանակություն ունի նաև ճիշտ քունը։ Կանանց ձվարանը կարգավորող հորմոնները գտնվում են գլխուղեղում և արտադրվում են գիշերը՝ ժամը 1-4-ն ընկած ժամանակահատվածում, իսկ այդ ժամին մեր բոլոր աղջիկներն արթուն են»։

Հ․ Թորոսյանը հավելեց, որ պետք է հետևել սննդակարգին, քնել շուտ ու հաճախակի դիմել բժշկին։ Նա ընդգծեց նաև, որ խնդիրների ճիշտ ու ժամանակին բացահայտումը կարող է ավելի հեշտացնել բուժումը ու աղջիկներին հետ պահել 21-րդ դարի ամենակարևոր ու վտանգավոր խնդիրներից մեկից՝ անպտղությունից։