Դիլիջանի «ձեռնադրված» քաղաքապետի համար ճանապարհները մաքրելը պատվից ցածր է (լուսանկարներ)

Արդեն երկու օր է՝ եղանակային պայմանները Հայաստանում վատացել են, տեղաշարժվելու դժվարություններ են առաջացել նաև Դիլիջանի շրջակայքում: Ինչպես միշտ, Դիլիջանի ոլորանների վրա նույն վիճակն է, ինչ ամեն տարի՝ մաքրված չէ, և այսօր մերկասառույցի պայմաններում ոլորաններում մեքենաներ են բախվել միմյանց, նաև արգելափակվել են ձյան ու սառույցի մեջ:

Այսօր Դիլիջանի ոլորանների վրա «Սպայկա» ընկերության բեռնատարը սահել է և փակել ճանապարհը, մեկ այլ բեռնատար սահելով կանգ է առել սարի մոտ, ճանապարհի տարբեր հատվածներում մեքենաներ են բախվել:

Արդեն երկու օր է՝ Հայաստանի բարձրադիր գոտիներում ձյուն է տեղում, ճանապարհներին մերկասառույց է, սակայն Դիլիջանի քաղաքապետարանը որևէ մաքրման աշխատանք չի իրականացրել, սա այն դեպքում, երբ նախօրոք հայտարարվել է, որ եղանակային պայմանները վատանալու են, ցրտելու է, սպասվում է ձյուն:

12 տարի Դիլիջանի քաղաքապետ «ձեռնադրված»Արմեն Սանթրոսյանը քաղաքապետ աշխատելու երկար ու ձիգ տարիներին այդպես էլ գլխի չի ընկել, որ ձմռանը ժամանակին ճանապարհները` հատկապես Դիլիջանի ոլորանները, պետք է պահել ուշադրության կենտրոնում, ձյուն է, դա նշանակում է՝ ճանապարհները մաքրել է պետք:

Ի դեպ, հիշեցնենք, որ Դիլիջանի քաղաքապետն աղքատ պաշտոնյա չէ և որ քաղաքապետ աշխատած տարիներին զգալի հարստություն է կուտակել: Երևի դա է պատճառը, որ ճանապարհների մաքրելը պատվից ցածր է համարում:

Արմեն Սանթրոսյանի 2017թ. հայտարարագիրը: Նա ունի երեք անշարժ գույք՝ երկու բնակարան ու մեկ հողամաս: Դրամական միջոցները կազմել են 9 միլիոն դրամ, 23 հազար ամերիկյան դոլար ու 5 հազար եվրո: Տարեսկզբից մինչ պաշտոնը ստանձնելու օրն ընկած ժամանակահատվածում էլ ունեցել է 2 միլիոն 775 հազար դրամի եկամուտ, որը գոյացել է աշխատավարձից:

Հիշեցնենք, որ Ա. Սանթրոսյանը Դիլիջանի քաղաքապետի պաշտոնն է զբաղեցնում արդեն 12 տարի՝ սկսած 2005 թվականից:

NEWSPRESS.am