Կարեն Կարապետյանին՝ մեկ կոշիկի երջանկություն

Վարչապետ Կարեն Կարապետյանը հարցազրույց է տվել և վարչապետի պաշտոնում որպես բացահայտում նշել. «կցանկանայի, որ մեզանում պրագմատիզմն ու ռացիոնալ մտածողությունը ավելի լայն տարածում ունենան։ Սակայն շատ հաճախ իլյուզիաներով ենք ապրում»:

Այս բնորոշումները վերաբերում են հայ ժողովրդին, ժողովուրդ, որ արդեն 27 տարի է՝ իլյուզիաներ չունի, ապրում է չոր ռեալիզմի մեջ: Մեր ժողովուրդը պարզապես իրեն չի կարող իլյուզիաներ թույլ տալ, երբ չորս կողմը սահման է, իսկ երկրի ներսում հավերժական ՀՀԿ-ն:

Պարզապես պետք է իրականությանը նայել ոչ թե վարչապետական, ապահովված անձի բարձունքից, այլ շարքային քաղաքացու, ով ապրում է աշխատավարձից աշխատավարձ, գրեթե չի օգտագործում կարագ և միս, իսկ մրգերը՝ տոնից տոն, քաղաքացու, ով ուրախանում է ամիսը մեկ անգամ տորթ պատրաստելով, կամ երջանկանում է, եթե աշնանը կարողանում է մեկ զույգ կոշիկ գնել՝ դեն նետելով մի քանի տարի օգտագործածը:

Եթե վարչապետը գտնում է, որ մեկ զույգ կոշիկ գնելն իլյուզիա է, ապա երևի թե պետք է նրան ևս ցանկանալ մեկ կոշիկ գնելու երջանկությունը: Ի դեպ, մեր երկրում կան մարդիկ, որ այդ երջանկությունը տարիներով չեն ունենում:

Այնպես որ՝ պրագմատիզմը մեր ժողովրդի մեջ դեռ ավելցուկային է: Պրագմատիկ ենք, երբ շուկայում ենք՝ հաշվարկում ենք անհրաժեշտը և ամենաէժանը, պրագմատիկ ենք, երբ հագուստ ենք գնում՝ երջանկությունից երջանկություն, պրագմատիկ ենք, երբ տոնական հագուստ կարողանում են աղջիկները ճարել, այ դա իսկական երջանկություն է:

Նման մանր ուրախություններ է ժողովրդին պարգևում ՀՀԿ իշխանությունը, պարգև, որտեղ իլյուզիաներին տեղ չկա, ոտից գլուխ չոր ռեալիզմ է:

Իսկ հետաքրքիր է՝ Կարեն Կարապետյանն այդ որտե՞ղ է տեսել իլյուզիաներով ապրող ժողովուրդ: Չի բացառվում՝ իր շրջապատում, որտեղ բոլորի գրպանները մշտապես կասկածելիորեն լիքն են, ստամոքսները՝ չափից դուրս գաստրոնոմիական, իսկ ժամանակը կանգ է առել կառավարությունում, իսկ նախկինում՝ «գազի» գրասենյակում:

Վարչապետը կարող է նաև հիշել, որ Հայաստանում յուրաքանչյուր 3-րդ մարդ աղքատ է, իսկ աղքատ ժողովուրդն ավելի քան պրագմատիկ է մտածում՝ իլյուզիաներով Հայաստանում ապրել հնարավոր չէ:

Իլյուզիաների «սեփականատեր» արդեն կա՝ կուսակցություն կուսակցությանս ՀՀԿ-ն է:

NEWSPRESS.am