Օրական կես ձուն՝ մեր սեղանից անպակաս

Այս օրերին հավկիթը թանկացել է մինչև 90 դրամ, ի դեպ, ոչ միայն հավկիթն է թանկացել: Այս սեզոնին հաճախ է պատահում, որ թռչնաբուծարանները չեն հասցնում սերնդափոխություն իրականացնել և նոր թռչնագլխաքանակ ձեռք բերել. արդյունքում հավկիթը թանկանում է: Թեև ձվի ներկրումներ եղել են, սակայն ձվի դեֆիցիտի պայմաններում ներկրողները, բնականաբար, փող են աշխատում. ինչքան հնարավոր է՝ թանկ գնով են ձուն իրացնում:

Հավկիթի թանկացումը մեկնաբանել են Գյուղատնտեսության նախարարությունից, այն է՝ Հանրապետությունում հավկիթի դեֆիցիտ չի սպասվում, և առաջիկայում շուկայում կվերականգնվի գների նախկին մակարդակը:

Ոչ ներկայով արտահայտվելու ձևակերպումը հուշում է, որ այս պահին հավկիթի դեֆիցիտ կա, փորձում են հարցը լուծել, ըստ ամենայնի, ներկրումների միջոցով:

Ինչ վերաբերում է Տնտեսական մրցակցության պաշտպանության պետական հանձնաժողովին, որը նման դեպքերում պետք է արձագանքի, ապա այնտեղ գտել են, որ թանկացումները «պայմանավորված են սեզոնային գնագոյացումներով»:

Երկու տարբեր կառույց նույն խնդրի վերաբերյալ տարբեր կարծիք ունեն, եթե իհարկե ևս մի քանի կառույց խառնվի հավկիթի դեֆիցիտի խնդրին, ապա կարծիքների զանազանության պակաս չի լինի: Սա այն է, ինչ կոչվում է դեմոկրատիա:

Սովորաբար, նման դեպքերում Թռչնաբույծների միության նախագահ Սերգեյ Ստեփանյանը մեկնաբանություն էր տալիս, սակայն, ինչպես երևում է, Սերգեյ Ստեփանյանին դժվար է գտնել, նա վաղուց ասուլիս չի տվել և մամուլի էջերում չի հայտնվում:

Պարզվեց, որ ՀՀ թռչնաբույծների միության նախագահ Սերգեյ Ստեփանյանին մեղադրանք է առաջադրվել ՀՀ քրեական օրենսգրքի 177 հոդվածի 3-րդ մասի առաջին կետի հատկանիշներով: Նա կասկածվում էր Շահումյան թռչնաֆաբրիկայից գողություն կատարելու մեջ: Ի դեպ, Ս. Ստեփանյանը ևս ֆաբրիկա ունի, և այն գտնվում է Շահումյան ֆաբրիկայի կողքին, ֆաբրիկայից կենցաղային իրար էին գողացել:

Ի դեպ, ՀՀ գյուղատնտեսության նախարարության տարածած հայտարարության մեջ նշվում է հենց Թռչնաբույծների միության հավստիացումները, թե հավկիթի դեֆիցիտ չի սպասվում: Հավատա՞նք: Գյուղատնտեսության նախարարության աղբյուրը խիստ կասկածելի է:

Այնպես որ և′ ԳՆ-ն, և′ ՏՄՊՊՀ-ն փորձում են թանկացումների հարցը լղոզել՝ անբովանդակ հայտարարություններով՝ մի օր հավկիթի հարցը կկարգավորվի:

Նշենք, որ ըստ Ազգային վիճակագրության ծառայության՝ օրական մեկ անձն օգտագործում է կես ձու, սակայն, ինչպես երևում է ըստ թանկացումների, այդ կես ձուն գնելու համար դեռևս պետք է սպասել:

NEWSPRESS.am