Հե՜յ գիդի, Գագիկ Խաչատրյան

Գնալով ՀՀ քաղաքացիների համար դժվարանում է Վրաստանից ապրանքների ներկրումը՝ թեկուզ անձնական նպատակներով: Միևնույնն է, ինչպես ԵԱՏՄ-ն հաշվարկես, մեջտեղում Վրաստանն է՝ իր արևմտյան կողմնորոշմամբ: Բացի այդ, ինչպես էլ որևէ ապրանք ներկրվի Հայաստան՝ բերվելու է Վրաստանով, այլ ճանապարհ չկա:

ԵԱՏՄ ցանկացած ապրանք անցնելու է ԵՄ-ի տարածքով, հետո մտնի Հայաստան, ի՞նչ անել:

Մինչև ԵԱՏՄ և ԵՄ «խաղացնելը» հայ-վրացական մաքսատներով ապրանք ներկրելն իսկական փորձանք էր, իսկ այժմ՝ ավելի վատ:

Թեկուզ նախկին ՊԵԿ նախագահ Գագիկ Խաչատրյանի ժամանակ էլ մի բան չէր, սակայն թույլ էին տալիս որոշ քանակի բեռներ ներկրել, իհարկե, իրենցից հետո, իսկ այ ռուսական «Գազպրոմի» իշխանության տարիներին «Գազպրոմի» թշնամի Վրաստանից թույլ չեն տալիս:

Ինչքան էլ փորձեն ԵԱՏՄ օրենքներով բացատրել, հասկանալի է, որ նախ ՊԵԿ-ը փորձում է իր ծակ բյուջեն լցնել, նաև յուրաքանչյուր ներկրումից փող դնել՝ և′ բյուջե, և′ սեփական գրպանը: Մաքսատանն աշխատելն իսկական ոսկու հանք է ցանկացած աշխատակցի համար, էլ ո՛ւր մնաց ՊԵԿ-ը, որը միլիոնների հետ է խաղում:

Ի դեպ, 5 կգ մանդարինի առնչությամբ ՊԵԿ-ից պատասխանել են.

«Համաձայն 2017 թվականի հուլիսի 1-ից ուժի մեջ մտած Եվրասիական տնտեսական հանձնաժողովի 2016 թվականի նոյեմբերի 30-ի N 157 որոշման՝ վերոհիշյալ ենթակարանտինային արտադրանքի միայն մինչև 5 կգ-ի Հայաստանի Հանրապետության (ԵԱՏՄ) տարածք ներմուծումը կարող է թույլատրվել՝ առանց համապատասխան պետական լիազոր մարմնի կողմից տրամադրված բուսասանիտարական հավաստագրի»:

Սա երեկ էր, իսկ այսօր կառավարության նիստի ժամանակ վարչապետը նշել է, որ գործող ապրանքների՝ տեղական և օտարերկրյա, ծագման երկրի հավաստագրերի տրամադրման և փորձաքննության անցկացման կարգը պարունակում է այնպիսի նորմեր, որոնք հստակ չեն, և դրանից ելնելով հավաստագրի տրամադրումը կամ ապրանքի փորձաքննության իրականացումն առաջացնում է հայեցողական լիազորությունների տարաբնույթ մեկնաբանությունների կատարման հնարավորություն:

Իհարկե, մի քիչ խուճուճ է ստացվել, սակայն պարզ է, որ փորձում են 5 կգ մանդարինի հարցը լղոզել:

Ի դեպ, ԵԱՏՄ-ն Հայաստանի երեկն էր, ԵՄ-ն՝ Հայաստանի վաղը: Քաղաքականությունը՝ քաղաքականություն, սակայն 5 կգ մանդարինն իր 5 կգ փաստաթղթերով ՀՀ քաղաքացիների այսօրն է:

NEWSPRESS.am