«Հերմինե Նաղդալյանն ու իր նմաններն էս ամեն ինչը սարքեցին, որ մենք մնանք դրսում» (ֆոտո, վիդեո)

Դատարանը որոշում է կայացրել բավարարել «Նորաշեն 2007»-ի սեփականատերերի հայցը՝ տուժածի չափով նրանց գումար տրամադրելով: Այս մասին NEWPRESS.am-ի հետ զրույցում ասաց «Նորաշեն 2007»-ի բնակիչ Մելիք Շահինյանը:

Դատարանի վճիռը, սակայն, ո՛չ նրան, ո՛չ էլ մյուս բնակիչներին վստահություն չի ներշնչում: Նախ, որոշմամբ չի հստակեցվում, թե ով և որքան գումար պետք է տա: Մյուս կողմից էլ, դատարանը ներկայացրել ենթադրյալ տուժողների ցուցակ, որի մեջ ընդգրկված է 107 անուն:

«Խորամանկ ձևով են կազմակերպել ամեն ինչ, հիպոտեկը ձևափոխել են գրավադրման, ամբողջ շենքը գրավադրել ու վաճառել: Գրավատուներն էլ ովքե՞ր են՝ հենց պաշտոնյաները. Էդ Հերմինե Նաղդալյանը, Ազգային անվտանգության աշխատակից Գագիկ Առաքելյանն ու նրանց նման տենց մեծ-մեծ պաշտոնավորներ, որ շատ կազմակերպված էս ամեն ինչը սարքեցին, ու հիմա կստացվի, որ նրանք կգնան, իրենց տոկոսներն էլ կստանան, իսկ մենք կմնանք փողոցում»,- մեզ հետ զրույցում նշեց բնակիչներից Արուս Վանյանը:

Նա նաև նկատեց, որ այդ բոլոր կեղծ գործարքները կատարել է Նոտարական գրասենյակի աշխատակցուհի Սուսաննա Դանիելյանը, բայց մինչ օրս ոչ ոք նրան այդպես էլ չի կանչել հարցաքննության:

«Ո՞վ է պատասխան տալու նրա արածների համար, հենց էդ պատճառով ենք էսօր մենք փողոցում մնացել»,-վրդովված ասաց բնակչուհին:

Ավելի վաղ հայտնել էինք, որ «Նորաշեն 2007»-ի բնակիչները պնդում են, որ իրենք հանրապետական Հերմինե Նաղդալյանի ու նրա ամուսնու կամայականության զոհն են: Վերջիններս խարդախությամբ սեփականացրել են իրենց բնակարանները:

Մանրամասները՝ տեսանյութում