Պիջակով երիտասարդի էնտուզիազմը մարել է

Պիջակով երիտասարդի ղեկավարությամբ կառավարության նիստերն արդեն կորցրել են իրենց էնտուզիազմը: Նախկինի պես չկան Պետգույքի կառավարման վարչության պետ Արման Սահակյանին ուղղված դիտողությունները, մեղմվել է դաշնակ նախարարների հանդեպ վերաբերմունքը. Արծվիկ Մինասյանն  անգամ կառավարությունում իրեն զգում է ինչպես ձուկը ջրում, հանձնարարականներն էլ նախորդների պես այլևս արձագանք չեն ստանում: Մի խոսքով՝ նիստ են գլորում մինչև 2018 թվականը՝ տեսնեն գլխներին ինչ է գալիս:

Թեև երեկվա նիստում մի փոքր աշխուժություն տեղի ունեցավ, սակայն ոչինչ էական չասող թեմայի շուրջ:

Բանն այն է, որ Գյուղատնտեսության նախարար Իգնատի Առաքելյանը զեկուցեց, որ նախատեսվում է «Հայանտառ» ՊՈԱԿ-ը վերակազմավորել՝ որպես կոմիտե և տեղափոխել Բնապահպանության նախարարության ենթակայության տակ՝ հաշվի առնելով այն, որ անտառները Հայաստանում ավելի շատ բնապահպանական դեր ունեն: Նկատենք, որ այս փոփոխությունն իրենից գրեթե ոչինչ չի ներկայացնում: Պատկերավոր ասած՝ դատարկ թեմա է, նախ չի փոխվում հաստիքացուցակը, չի փոխվում նաև ՊՈԱԿ-ի դաշնակ ղեկավար Միքայել Մանուկյանը, միայն փոխվում է կառավարման ձևը՝ ՊՈԱԿ-ը դարձնելով կոմիտե: Ե՞վ: Իհարկե՛, ուրիշ ոչինչ:

Սակայն այս անիմաստ տեխնիկական հարցից զատ, մի փոքր նրբերանգ կարելի է նկատել՝ վարչապետը կառավարության նիստին նորից «կպավ« Արծվիկ Մինասյանին: Նա 10 օրվա ընթացքում ակնկալում է անտառների պահպանության վերաբերյալ իրականացվելիք աշխատանքների ձևակերպումը: Սա Մինասյանն անհնարին է համարում, քանի որ ռեֆորմները նախատեսված են ամբողջովին ավարտել երեք տարվա ընթացքում:

«Պարոն Մինասյան, երեք տարվա ռեֆորմ, նշանակում ա՝ ռեֆորմ չըլնի: Ըտենց ռեֆորմ չկա, որ երեք տարի ա տևում: Այդ իսկ պատճառով՝ ինչ-որ ծրագիր երեք տարվա՝ հա, բայց երեք տարվա ռեֆորմ՝ չէ»,– Մինասյանին պատասխանեց ջղաձիգ Կարեն Կարապետյանը:

Մի կողմ դնելով այն հանգամանքը, որ, այո՛, դիտողությունը խիստ տեղին էր, առավոտից երեկո նախարարություններում սուրճ խմողներին ի վերջո պետք է աշխատանքով զբաղեցնել, բայց, մյուս կողմից, արդարացիորեն հարց է առաջանում՝ և ո՞վ է խոսում կարճ ժամանակում կատարվող ռեֆորմներից: Նույն վարչապետը, ով պաշտոնին նշանակվել է 2016 թվականից, սակայն ժողովրդի կենսամակարդակի վրա իր նշանակումն այդպես էլ չի ազդել: Հակառակը՝ այսօր ունենք ջրի սակագնի ավելի բարձր մակարդակ, հունվարի 1-ից էլ շուրջ 800 ապրանքատեսակ կթանկանա:

Սա խիստ բավարար է կարճ ժամանակահատվածում ռեֆորմներ սիրող վարչապետին ձախողված համարելու համար:

Մի խոսքով՝ այստեղ տեղին է մեջբերել Սողոմոն իմաստունի հայտնի խոսքերը՝ «Ունայնություն ունայնությանց. ամեն ինչ ունայն է»:

NEWSPRESS.am