ՀՔԾ պաշտոնյան ուղիղ խոսքով ինձնից պահանջում էր զրպարտել անմեղ մարդկանց՝ իմ ազատության դիմաց. Անի Հովհաննիսյան (տեսանյութ)

ՀՔԾ Կոռուպցիոն, կազմակերպված և պաշտոնեական հանցագործությունների քննության վարչության պետ Կարեն Կարապետյանն «Անալիտիկ» կայքի գլխավոր խմբագիր Անի Հովհաննիսյանին հորդորել է մեղադրել ամենատարբեր մարդկանց՝ ազատություն ստանալու դիմաց: Այս մասին այսօր հայտարարեց Անի Հովհաննիսյանը՝ լրագրողների հետ հանդիպման ժամանակ:

Նա նշեց, որ իր ձերբակալվելուց անմիջապես երկու օր անց՝ ՀՔԾ վարչության պետը Հովհաննիսյանին առաջարկել է իր չկատարած հանցանքում մեղադրել տարբեր մարդկանց և որոշ մարդկանց մասին էլ տեղեկություններ հայտնել:

«Նա ոչ թե հետաքրքրված էր, կամ հարցաքննում էր, այլ ուղիղ խոսքով ինձնից պահանջում էր զրպարտել անմեղ մարդկանց. օրինակ՝ Արսեն Բաբայանին… Ես չէի պատրաստվում ընդունել չարածս, էլ ուր մնաց չարածիս մեջ հանցակից դարձնել անմեղ մարդկանց, ովքեր ոչ մի կապ չէին կարող ունենալ այս ամենի հետ»,-ընդգծեց Անի Հովհաննիսյանը՝ հավելելով, որ ՀՔԾ-ում այս սցենարը չէին մտածել:

«Նրանց թվում էր, որ ես կին եմ, կկոտրվեմ ու լացելով կհամաձայնեմ իրենց գործարքին, բայց եթե նույնիսկ ինձ ցմահ դատապարտեին, ես չէի համաձայնվի համագործակցել»,-ասաց Անի Հովհաննիսյանը:

Նա նշեց, որ այս առիթով ՀՔԾ պետն իրեն հորդորել է միամիտ չլիներ, քանի որ եթե ինքը չհամագործակցի, ապա կան իրենց հետ աշխատողներ՝ գրպանի շներ, ովքեր գրում են իրենց պատվերով:

ՀՔԾ-ի համար աշխատող լրագրողների շարքը, Անի Հովհաննիսյանի խոսքով, գլխավորում է «Ժողովուրդ» թերթի խմբագիր Թագուհի Թովմասյանը:

Համենայնդեպս, «Անալիտիկի» տնօրենը վստահեցնում է, որ այդ մասին իրեն հայտնել է ՀՔԾ վարչության պետը:

«Կարեն Կարապետյանն ինքնավստահ կերպով ինձ հայտնեց, որ քրեական գործը ՀՔԾ-ի վարույթում քննելու իրավաբանական հիմքը «Ժողովուրդ» օրաթերթում ՀՔԾ-ի թելադրանքով տպագրված հոդվածն է եղել: Այսինքն՝ նախաքննական մարմինը պատվիրել է իմ դեմ սուտ հոդված ու այդ իսկ սուտ հոդվածի հիմքով քրեական գործը Դատախազությունից փոխանցել ՀՔԾ»,-ասաց Անի Հովհաննիսյանը:

Նա մարտական է տրամադրված. «Պայքարել եմ և շարունակում եմ պայքարս ո՛չ թե իմ ազատության համար, որն ապօրինաբար և զուտ իմ մասնագիտական գործունեությամբ պայմանավորված սահմանափակվել էր, այլ արդարության հաստատման և խոսքի ազատության համար։ Ես շարունակելու եմ պայքարը և ՀՀ ատյանները սպառելուց հետո, անհրաժեշտության դեպքում, կդիմեմ նաև ՄԻԵԴ»,-ընդգծեց Հովհաննիսյանը:

Ասուլիսն ամբողջությամբ՝ տեսանյութում