Հայ միլիարդատերերը կազինո են բացում, հայ երեխայի վիրահատության ծախսերը Կադիրովն է հոգում

Չեչենական լրատվամիջոցները հրապարակել են տեղեկատվություն այն մասին, որ Չեչնիայի նախագահ Ռամզան Կադիրովը վճարել է Ստավրոպոլում ապրող հայ երեխայի` Խաչատուր Խաչատրյանի վիրահատության համար:

Ամբողջ աշխարհում ընդունված է, որ մարդիկ, ովքեր հարստացել են ժողովրդի շնորհիվ և ժողովրդի միջոցներով, ունեն հիմնադրամներ և փոխանցումներ են անում՝ նույն այդ մարդկանց կարիքները որոշ չափով թեթևացնելու համար: Դա կարող է լինել կրթական, առողջապահական, բնակարանային և այլն:
Այնպես չէ, որ հայ մեծահարուստների պակաս կա, սակայն նրանց մոտ հանրությանն օգուտ տալու որևէ նախաձեռնություն գրեթե չի լինում:

Կարող են միլիոնավոր դոլարների հասնող հարսանիքներ, ծնունդներ կամ դատարկ խնջույքներ կազմակերպել, հրավիրել լրատվամիջոցներին, նրանց վճարել՝ իրենց ճոխությունը ցուցադրելու համար, սակայն որևէ օգտակար քայլ մարդկանց համար, որևէ կերպ չեն կարողանում անել:

Որևէ կառույց չկա կամ հիմնադրամ, որ Խաչատուր Խաչատրյանի նման երեխաներին, կամ ծանր հիվանդություն ունեցողների համար գումարներ փոխանցի՝ նրանց բուժելու կամ այլ կարիքների համար:

Պատասխանն այն է, որ միլիոնատերերը, սովորաբար, սեփական քրտինքով չեն վաստակում իրենց ունեցվածքը, այլ տարբեր խարդախությունների միջոցով և, սովորաբար, դողում են այդ փողերի վրա. միայն ճոխության ցուցադրությամբ են զբաղված: Չունևորի հոգեբանությունը մարդկանց մոտ մնում է անգամ հարստության ժամանակ: Կարևորը հարստությունը ցուցադրելն է. կարեկից լինել, աջակցել մարդկանց, սա արդեն անհնար է և չի տեղավորվում հանպատրաստից հարուստների մտածելակերպի մեջ:

Չկա՞ն հայ մեծահարուստներ Ռուսաստանում, որ հայ երեխայի համար փող է վճարել Ռամզան Կադիրովը, թե՞ միայն այդ մեծահարուստները Հայաստանում մոլեր և կազինոներ, հանքավայրեր կամ փող լվանալու համար են:

Նշենք, որ աշխարհի ամենահարուստ հայն ապրում է Ռուսաստանում, նա Սերգեյ Գալիցկին (Հարությունյան) է: Ռուսաստանի խոշորագույն Մագնիտ առևտրային ցանցի սեփականատիրոջ կարողությունը գնահատվել է 8.3 մլրդ դոլար: Ի դեպ, ռուս միլիարդատերերի ենթացուցակում Գալիցկին 15-րդն է:

ՌԴ-ում է ապրում նաև «Տաշիր» ընկերությունների խմբի սեփականատեր Սամվել Կարապետյանը:

Աշխարհի ամենահարուստ 5-րդ հայը նույնպես ապրում է Ռուսաստանում. նա «Ռոսգոսստրախի» սեփականատեր Դանիլ Խաչաուրովն է, նրան են հետևում ՌԴ-ում ապրող Նիկոլայ և Սերգեյ Սարկիսով եղբայրները:

Ներկայացված հայերն աշխարհի խոշորագույն միլիարդատերերից են, իսկ միլիոնատեր հայեր՝ ինչքան ուզեք, անգամ Հայաստանում 4 միլիարդատեր կա, իսկ հայ երեխայի բուժման համար վճարել է Ռամզան Կադիրովը:

NEWSPRESS.am