«Ինչպե՞ս կարող են, առանց ծնողին տեղյակ պահելու, երեխային տանել պատվաստման». դպրոցներում գարդասիլով պատվաստում չի իրականացվի

Ֆեյսբուքյան որոշ օգտատերեր սոցցանցում իրենց մտահոգությունն էին հայտնել՝ կապված գալդասիլով պատվաստման հետ: Նրանցից մի քանիսը նկատել էին, որ տեղեկություն ունեն այն մասին, թե իրենց երեխաներին, դասերի հաշվին, պետք է տանեն պատվաստման՝ առանց ծնողին տեղյակ պահելու:

«Ինչպե՞ս կարող է որևէ մեկը, առանց ծնողին տեղյակ պահելու, երեխային տանել պատվաստման, ես դա առաջին անգամ Ձեզնից եմ լսում, չկա նման բան»,-NEWSPRESS.am-ի հարցմանն ի պատասխան՝ այսպես արձագանքեցին Կրթության և գիտության նախարարության տեղեկատվության բաժնի աշխատակիցները, ովքեր, այնուամենայնիվ, հորդորեցին զանգահարել հասարակայնության հետ կապերի բաժին և որտեղից ավելի հստակ կպատասխանեն հարցին:

«Չէ՛, նման որոշում չկա, որ դպրոցներին հանձնարարեն երեխաներին տանել պատվաստման»,- ասաց բաժնի աշխատակցուհին, ով ապահովության համար, փորձեց ճշտել հարցի պատասխանն իր կոլեգաների հետ: «Չունենք չէ՞, նման ահազանգ, ժողովո՛ւրդ»,-հետաքրքրվեց նա հավանաբար իր կողքին այդ պահին գտնվող աշխատակիցներից:

Եվ, հավանաբար, համոզիչ արձագանք չստանալով՝ հեռախոսի մեջ ասաց. «Գիտե՞ք, նման բան չկա, բայց ուզո՞ւմ եք մի հատ զանգեք Առողջապահության նախարարություն, հնարավոր է՝ ինչ-որ պայմանավորվածություն լինի: Ես չգիտեմ»,- ասաց նա:

Իսկ Առողջապահության նախարարություն վաղ առավոտից կատարած մեր զանգերն այդպես էլ մնացին անպատասխան: Մեզ չհաջողվեց կապ հաստատել նույնիսկ թեժ գծի աշխատակիցների հետ: Այնպիսի տպավորություն է, որ բոլորի համար այսօր ազատ օր է:

Սակայն, NEWSPRESS.am-ը հետևողական կլինի՝ այս խնդիրը բացահայտելու ուղղությամբ:

Արմինե Մկրտումյան