Հայաստանի թիվ մեկ սննդամթերքը՝ բարելավիչներով

2017 թվականի հունվար-հոկտեմբեր ամիսներին արտադրվել է 226.8 հազար տոննա հաց` 2016թ-ի նույն ժամանակահատվածի համեմատ նվազելով 2.4 տոկոսով:

Նախորդ տարի նույն ժամանակահատվածում արտադրվել է 232.4 տոննա հաց:

2017թ. հունվար-հոկտեմբեր ամիսներին 3.1%-ով նվազել է նաև ալյուրի արտադրությունը՝ կազմելով 135.2 հազար տոննա:

ԱՎԾ-ի տվյալներով՝ մեր քաղաքացիներն օրական օգտագործում են 400 գրամ հարց:

Մասնագետները խորհուրդ են տալիս՝ կախված հացի կալորիականությունից, օգտագործել 180-240 կկալ հաց, իսկ 400 գրամ հացն օրական, ըստ դիետոլոգների, բավարար է անգամ գեղեցիկ կազմվածք ունենալու համար: Այսինքն՝ ըստ ԱՎԾ-ի՝ ՀՀ յուրաքանչյուր քաղաքացի օգտագործում է այնքան հաց, որ չգիրանա:

Գաղտնիք չէ, որ հացը և հացամթերքը Հայաստանում ՀՀ քաղաքացու օրաբաժնում զգալի տեղ է զբաղեցնում. ՀՀ քաղաքացիները կա′մ հացն են շատ օգտագործում, կա′մ հրուշակեղենն ու մակարոնեղենը:

2017թ., ի տարբերություն հացի արտադրության՝ հրուշակեղենի արտադրության ծավալներն ավելացել են շուրջ 40 տոկոսով, իսկ մակարոնեղենի արտադրությունը՝ 1.7 տոկոսով:

Հաշվի առնելով վերջին թանկացումները, 2018թ. սպասվում է թե′ հացի, թե′ մակարոնեղեն-հրուշակեղենի ծավալների ավելացում. մատչելին մնում են ալյուրային ծագման սննդամթերքը:

Ի դեպ, վերջին տարիներին հատկապես մասնագետները խորհուրդ են տալիս օգտագործել կա′մ մատնաքաշ, կա′մ լավաշ, քանի որ մնացած հացատեսակների մեջ օգտագործում են էմուլգատորներ, թթվեցնողներ, արոմատիզատորներ և այլն, կամ այսպես ասած հացի «բարելավիչներ»:

Նշենք նաև, որ այս տարրերի օգնությամբ հացի խմորն արագ է «հասնում»՝ արհեստականորեն, իսկ կաթնաթթվային խմորիչների վրա հիմնված հացի արտադրությունն արդեն պատմություն է:

Իսկ «բարելավիչները» Հայաստան են ներմուծվում հիմնականում Թուրքիայից՝ տոննաներով, իսկ հացը համարվում է հայի թիվ մեկ նախընտրած սննդամթերքը: Պատահական չէ, որ մեր ժողովրդի մոտ հիվանդացությունների աճ կա, հատկապես քաղցկեղի:

NEWSPRESS.am