Պուտինը կառաջադրվի նախագահական ընտրություններում

Ռուսաստանի Դաշնության նախագահ Վլադիմիր Պուտինը կառաջադրվի հաջորդ նախագահական ընտրություններին, հայտնում է BBC-ն:

Պուտինը, ով բազմիցս խուսափել է պատասխանել իր առաջադրման մասին լուրերին, Նիժնի Նովգորոդում «Газ» գործարանի աշխատողների հետ հանդիպման ժամանակ, պատասխանելով աշխատակիցներից մեկի հարցին՝ ասել է, որ, ամենայն հավանականությամբ, մյուս նախագահական ընտրություններին կառաջադրվի՝ որպես նախագահի թեկնածու:

Վլադիմիր Պուտինը երկար ժամանակ լռություն էր պահպանում ՝ 2018 թվականի նախագահական ընտրություններին իր մասնակցության վերաբերյալ, սակայն գրեթե ոչ ոքի մոտ կասկած չկար, որ նա կառաջադրվի: Վերջին շրջանում Կրեմլում բուռն քննարկվում էր՝ երբ և որտեղ նա կհայտարարի այդ մասին:

Դեռ հայտնի չէ, թե ինչպես նա կառաջադրվի՝ որպես «Միացյալ Ռուսաստան» կուսակցության անդա՞մ, թե՞ կինքնաառաջադրվի: Վերջին տարբերակի դեպքում, ըստ օրենքի, նա ստիպված կլինի 300 հազար համախոհի ստորագրություն հավաքել՝ առաջադրվելու իրավունք ստանալու համար:

Պուտինի հայտարարությունից հետո «Միացյալ Ռուսաստան» կուսակցությունը հայտարարել է, որ իրենք սատար կկանգնեն Պուտինին՝ անկախ նրա առաջադրման կարգավիճակից: Ավելի ուշ, լրագրողի այն հարցին, թե ո՞վ է գլխավորելու նրա նախընտրական շտաբը, Պուտինը պատասխանել է, որ դեռ չի որոշել:

Նախկինում՝ 2000 և 2004 թվականներին Վլադիմիր Պուտինն ինքնաառաջադրվել է, իսկ 2012 թվականին առաջադրվել որպես «Միացյալ Ռուսաստան» կուսակցության թեկնածու: Ավելի վաղ նախագահական ընտրություններին մասնակցելու մասին իրենց որոշումն էին հայտնել Քսենյա Սոբչակը, Վլադիմիր Ժիրինովսկին և գործարար Բորիս Տիտովը: