Վիգեն Սարգսյանը Ստալինից հեչ բան չի՞ սովորել

Վիգեն Սարգսյանի՝ Պաշտպանության նախարար նշանակվելուց հետո, նրա անվան շուրջ տարբեր քննարկումների պակաս չկա. սկսած բանակում չծառայելուց, մինչև կուտակած հարստությունը: Պաշտոնավարման առաջին օրից Վիգեն Սարգսյանն սկսել է «հնձել» ՊՆ-ի շարքերը:

Պատմաբանները կհիշեն, թե ինչպես Ստալինը կտրեց գեներալների, գնդապետերի, բարձրաստիճան զինվորականների գլուխները, իսկ երբ սկսվեց Երկրորդ համաշխարհային պատերազմը, ԽՍՀՄ բանակում մի խելքը գլխին զորավար չկար: Մի քանիսին նա ազատեց բանտերից, մնացած բարձրագույն սպայակազմը «սարքվեց» հենց պատերազմի տարիներին՝ բայց արդեն միլիոնավոր զոհերի և տարածքային կորուստների գնով:

Իսկ Վիգեն Սարգսյանը պատմություն չի՞ սովորել: Հայաստանը գտնվում է այնպիսի իրավիճակում, որ ամեն քայլափոխի հիշեցնում են՝ խաղաղությունից պատերազմ մեկ քայլ է, իսկ ի՞նչ է անում Վիգեն Սարգսյանը: Նա «հունձ» է սկսել ՊՆ-ում՝ սպաներ, գեներալներ, բարձրաստիճան սպաներ և անձնակազմ: Նման վարքագծով նա ո՞ւր է մտադիր հասնելու՝ բանակի և պաշտպանության նախարարության կազմալուծմա՞ն:

Եթե վաղը, Աստված մի արասցե, պատերազմ լինի՝ նա է՞ գնալու բանակ, թե նրա ազգականները, ո՞վ է մարտավարություն մշակելու. նա՞, որ մեկ օր բանակում չի ծառայել, թե՞ նրա մտերիմներն ու կուսակիցները, որոնք ևս չգիտեն՝ վառոդի հոտն ու գույնն ինչպիսին են լինում:

Իհարկե, բանակում կան նաև կարգազանց սպաներ և պաշտոնյաներ: Ֆեյսբուքում հրաշալի միտք կար՝ պատերազմի հերոսները պարտվեցին խաղաղությանը: Մարդիկ, ովքեր արյան գնով հաղթանակներ տարան՝ չկարողացան իրենց գտնել խաղաղության մեջ կամ վերածվեցին խաղաղության չինովնիկների, սակայն արդեն «պատերազմի մասնակից» կարգախոսը շալակած:

Շատ քչերը հպարտությամբ տարան իրենց մասնակցությունը՝ գտնելով, որ երկրի հանդեպ իրենց պարտքն են կատարել զենք վերցնելով և ոչինչ:

Սակայն այս պահին ազատվել մեծ թվով սպաներից և զինվորականներից, պարզապես անմտություն է: Մենք չենք կարող մեզ նման ճոխություն թույլ տալ: Եթե այսօր մեր բանակին չպահենք և չկերակրենք, ստիպված կլինենք՝ մեկ ուրիշ բանակի կերակրել. հասկանալի է, թե ում:

Ինչքան էլ դա խոսքերով չենք ցանկանում, սակայն սպաների և բարձրաստիճան զինվորականների պաշտոնանկություններից, կրճատումներից հետո դժվար հարց է լինելու, թե ի վերջո ի՞նչ է ուզում ՊՆ-ից և բանակից Վիգեն Սարգսյանը:

Վիգեն Սարգսյանն այսօր ՊՆ կաբինետում է, վաղը կարող է ԱԻՆ կաբինետում լինել կամ նախագահի աշխատակազմում, կարճ ասած՝ մի տաքուկ տեղ, ինչպես սովոր է, սակայն թե՛ Հայկազ Բաղմանյանը, թե՛ Մովսես Հակոբյանը, թե՛ Էնրիկո Ապրիամովը, թե՛ կրճատված ու կրճատման սպառնալիքի տակ գտնվող մյուս զինվորականները գնալու են մարտի դաշտ և կռվելու են՝ ամեն մեկն անելու է իր գործը:

…Միայն թե այնտեղ չի լինելու Վիգեն Սարգսյանը:

Չմոռանանք, որ մամուլում նշվում էր, որ Վիգեն Սարգսյանն ամերիկյան հատուկ ծառայությունների հետ ջերմ հարաբերություններ ունի: Արդյոք ՊՆ-ում կրճատումները նշանակո՞ւմ են, որ նա ինչ-որ հրահանգ է կատարում՝ դժվար է ասել, սակայն այն, որ նա վերջերս ճոխ բնակարան է ձեռք բերել Հյուսիսային պողոտայում, որ անգամ ամեն ինչ տեսած և լսած մեծահարուստներին է զարմացրել՝ փաստ է:

NEWSPRESS.am