Ինչո՞ւ մեր մարզիկներն անհաջողության մատնվեցին Բաքվում

Հռոմում կայացած Եվրոպական օլիմպիական կոմիտեների համաժողովի ժամանակ որոշվեց 2015 թվականից անցկացնել Եվրոպական նոր օլիմպիական խաղեր:Առաջինն այդ խաղերն անցկացելու հնարավորությունը ստացավ Բաքուն՝ հայտ ներկայացրած միակ քաղաքը: Բաքուն Եվրոպական նոր օլիմպիական խաղերի մայրաքաղաք ընտրվեց փակ քվեարկությամբ՝ ստանալով 38 կողմ, 8 դեմ և 2 ձեռնպահ ձայն:

Համաժողովին ներկա Հայաստանի ազգային Օլիմպիական կոմիտեի ներկայացուցիչները հրաժարվեցին մասնակցել քվեարկությանը:

Որոշվեց, որ Եվրոպական Օլիմպիական 1-ին խաղերը տեղի կունենան Բաքվում, 2015թ. հունիսի 12-28-ը։

Հայաստանի մարզիկների մասնակցության հարցն այդ խաղերին հայտնի պատճառներով երկար ժամանակ քննարկման թեմա էր։ Այդուհանդերձ, հայ մարզիկները մեկնեցին Բաքու։

Բաքվում անցկացված Եվրոպական խաղերին մեր մարզիկների մասնակցության, այնտեղ տեղի ունեցած ուշագրավ իրադարձությունների մասին է «նոր Անդրադարձի» հարցազրույցը ՀՀ ազատ ոճի ըմբշամարտի հավաքականի գլխավոր մարզիչ Արայիկ Բաղդատյանի հետ։

-Պարոն Բաղդատյան, սկսենք ամենամտահոգիչ հարցից. լիարժեք ապահովվա՞ծ էր մեր մարզիկների անվտանգությունը։

– Մյուս հավաքականների հետ միասին մենք ապրել ենք օլիմպիական ավանում, մեզ չեն մեկուսացրել, սնվել ենք ընդհանուր ճաշարանում, բոլորի հետ միասին մարզվել ենք։ Ուղղակի մեզ ավելի ուշադիր էին հետևում, քան մյուսներին։ Չեմ կարող ասել, թե անվտանգության հետ կապված խնդիրներ են եղել. որևէ մեկս որևէ խոչընդոտ չենք ունեցել։

-Ի սկզբանե քննարկվում էր Բաքվի խաղերին Հայաստանի մասնակցության հարցը։ Այժմ արդեն հետադարձ հայացքով նայելիս ի՞նչ եք կարծում. պե՞տք էր մասնակցել, թե՞ ոչ։

-Եթե մասնակցել ենք՝ ուրեմն պետք էր։ Աշխարհի առաջնությունից առաջ սա նախապատրաստական փուլ էր մեզ համար։ Ես այս մրցաշարը չեմ քաղաքականացնում, այն կարող էր ցանկացած երկրում լինել. այս անգամ Բաքվում էր։

– Ինչպիսի՞ն էր հանդիսատեսի վերաբերմունքը մեր մարզիկների նկատմամբ։

-Երբ հաղորդավարը կարդում էր՝ Հայաստան, տրիբունաներից անմիջապես սուլոցներ ու գոռոցներ էին սկսվում։ Այդպես էլ պիտի լիներ, մենք դրան պատրաստ էինք… Թեպետ երբ նրանք էին մեզ մոտ մրցաշարերի մասնակցում, նման բան չի եղել։ Դա խոսում է մեր ժողովուրդների մակարդակների մեծ տարբերության մասին։

– Ի՞նչ ակնկալիքներով էիք գնացել Բաքու, և արդարացա՞ն արդյոք դրանք։

-Բաքվի խաղերին ազատ ոճի ըմբշամարտի մեր հավաքականը մասնակցեց վեց մարզիկներով, հիմնականում՝ 1-ին համարներով։ Տղաները տղամադրված էին հաղթանակի, սակայն պետք է խոստովանել, որ սպասվածից թույլ հանդես եկան։

-Ձեր կարծիքով, ո՞րն էր անհաջողության պատճառը։

– Կարծում եմ, հիմնական պատճառը նրանց հոգեբանական վիճակն էր։ Արդյունքները ցույց տվեցին, որ նրանք հոգեպես պատրաստ չէին Բաքվում մրցակցելու։ Չնայած պետք է փաստել, որ մրցավարական ակնհայտ խախտումներ էլ եղան, ինչը ևս իր ազդեցությունն ունեցավ արդյունեքների վրա։ Սակայն չի կարելի անհաջողության պատճառը միայն մրցավարական սխալները համարել։

-Իսկ գուցե վա՞տ էիք պատրաստվել։

-Անկախ ամեն ինչից՝ տղաներից գոհ եմ։ Եվրոպական խաղերից մեդալ չունեցանք, բայց առջևում աշխարհի առաջնությունն է, որին, համոզված եմ, ցույց կտանք, թե ինչպես ենք պատրաստված։ Մենք թիմում ունենք Եվրոպայի և աշխարհի չեմպիոն Դավիթ Սաֆարյան, ունենք շատ ուժեղ մարզիկներ՝ Վոլոդյա Ֆռանգուլյան, Մուսա Մուրթազալիև, Գրիգոր Գիրգորյան,Գարիկ Բարսեղյան, Լևան Բերյանիձե։ Այս տղաներից յուրաքանչյուրը մեծ հնարավորություններ ունի և կարող է աշխարհի առաջնությունից մեդալներով վերադառնալ։ Անհաջողությունը պետք չէ ցավագին ընդունել, սա նախապատրաստական փուլ էր։

-Չե՞ք կարծում, որ պատճառներից մեկը նաև այն է, որ մարզիկների հետ լուրջ հոգեբանական պատրաստվածության աշխատանքներ չեն տարվել։

-Չի կարելի միանշանակ այդպես ասել, քանի որ, անկախ ամեն ինչից, Բաքվում լինելն արդեն լարվածություն էր։ Բացի այդ, հասարակական ուշադրությունը չափազանց շատ էր սևեռված այդ խաղերի վրա, ինչը ևս իր ազդեցությունն ունեցավ տղաների վրա։ Երիտասարդ մարզիկներ են։ Սա փորձություն էր նրանց համար, ինչը հետագայում կհաղթահարվի։

-Բաքվում հարցազրույց տվե՞լ եք։

-Ոչ։ Փորձ էլ չի եղել մեզ մոտենալու, հարց տալու։ Մենք գնացել էինք մրցելու։ Հանդիպումներ ու շփումներ են եղել միայն մարզիկների ու մարզիչների հետ։

-Ինչպիսի՞ն է մարզական տարին Հայաստանի ըմբշամարտի ազգային հավաքականի համար, ինչպիսի՞ ծրագրեր կան, ի՞նչ մրցաշարեր են սպասվում առաջիկայում։

-Մեր գլխավոր մրցամարտը սեպտեմբերի 6-13-ը ԱՄՆ Լաս Վեգաս քաղաքում անցկացվելիք աշխարհի առաջնությունն է, որտեղ 1-ից 5-րդ տեղերը նվաճելու դեպքում Ռիո Դե Ժանեյրում կայանալիք օլիմպիական խաղերի ուղեգիր է տրվում։ Մենք լրջորեն ենք պատրաստվում այդ առաջնությանը… Մինչև այդ մեր հավաքականը Ծաղկաձորում ուսումնամարզական հավաք կանցկացնի։ Այնուհետև «Դինամո» մարզասրահում տեղի կունենա փառաբանված ըմբիշ, Եվրոպայի չեմպիոն, աշխարհի եռակի գավաթակիր, օլիմպիական խաղերի փոխչեմպիոն, ըմբշամարտի ֆեդերացիայի պատվավոր նախագահ Ստեփան Սարգսյանի 20-րդ ավանդական հոբելյանական միջազգային մրցաշարը, որին կմասնակցեն թիմեր ավելի քան տասը երկրից։ Այդ մրցաշարից հետո՝ օգոստոսի 1-14-ը, Ռուսաստանի Դաշնության մարզիկների հետ համատեղ հավաք ենք ունենալու Կիսլովոդսկում: Օգոստոսի 18-27-ը ևս մեկ հավաք կանցկացնենք Վրաստանում։ Վերջին հավաքը մեր հավաքականը կանցկացնի արդեն ԱՄՆ-ում , Լաս Վեգասում, նույն մարզասրահում, որտեղ պետք է անցկացվի աշխարհի առաջնությունը։ Դրանից մի քանի օր անց արդեն կմեկնարկի աշխարհի առաջնության մրցապաքարը։

-Արդեն պա՞րզ է, թե ովքեր են ընդգրկված լինելու հավաքականի կազմում։ Ի՞նչ ակնկալիքներ ունեք աշախարհի առաջնությունից։

-Աշխարհի առաջնությունը նախաօլիմպիական է։ Շատ դժվար է լինելու, բայց մեր վեց մարզիկներն էլ հնարավորություն ունեն նվաճելու և՛ վարկանիշ, և՛ մեդալ։ Մնացածն արդեն ցույց կտա մրցագորգը։ 70 և 97 կգ քաշային կարգերում մենք Բաքվի խաղերին մարզիկներ չունեինք։ Այդ քաշային կարգերում թեկնածությունը կորոշվի Ստեփան Սարգսյանի միջազգային մրցաշարից հետո։ Միջազգային մրցաշարին 97 կգ քաշային կարգում կմասնակցի փորձառու մարզիկ Էդգար Ենոքյանը, ով վնասվածք էր ստացել և հիմա արդեն վերականգնվել է, ինչպես նաև երիտասարդ ըմբիշ, երիտասարդների Եվրոպայի և աշխարհի մրցանակակիր Վիկտոր Կազիշվիլին։ Դրանից հետո մեր հավաքականն ամբողջությամբ կկազմավորվի և պարզ կլինի, թե ովքեր կմասնակցեն աշխարհի առաջնությանը։