«Տղես, էս էն Գյումրին չի, ինչ 30 տարի առաջ էր». Գյումրին՝ երկրաշարժից 29 տարի անց (լուսանկարներ)

2017 թվական, դեկտեմբերի 7:

Գյումրիի փողոցները մարդաշատ են, եկեղեցու բակում հավաքված են սևազգեստ մարդիկ: Գյումրեցիները հիշում են իրենց մեծ երկրաշարժը, հուզվում, լաց լինում, մաքրում այտերին կուտակված արցունքներն ու նայում Ամենափրկիչ եկեղեցուն:

Ժամանակը փորձում է լավացնել գյումրեցու վերքերը:

Այդ օրվանից անցել է մոտ 30 տարի, սակայն Գյումրին դեռ չի կարողանում հաղթահարել ու վերականգնել իր նախկին տեսքը: Քաղաքի փողոցներում կարելի է տեսնել 29 տարվա փլատակները, 29 տարվա կիսաքանդ շենքերն ու 29 տարի հետո հսկա շենքերի տեղում դատարկ մնացած որբ հողակտորները:

«Տղես, էս էն Գյումրին չի, ինչ 30 տարի առաջ էր: Էդ ժամանակ Գյումրին աշխարհի ամենագեղեցիկ քաղաքն էր, Հայաստանի թիվ 1 մշակութային կենտրոնը: Եթե պտտվես քաղաքի փողոցներում, ապա կտեսնես Գյումրու 10-20 տոկոսը: Ինձ շատ քիչ է մնացել, որ ապրեմ: Ոտքերիս վրա կանգնած կմնամ այնքան ժամանակ, մինչև նորից տեսնեմ Ամենափրկիչ եկեղեցու բաց դռները: Եկեղեցում պատարագ լսելուց հետո նոր կմեռնեմ»:

Զրույցն ավարտեց, դեմքով պտտվեց դեպի Ամենափրկիչ եկեղեցին, խաչակնքվեց ու լուռ հեռացավ:

Երկրաշարժի ականատեսները լուռ են:

Նրանք չեն խոսում, այլ միայն հիշում են:

Հիշում են հին ու գեղեցիկ Գյումրին:

Այդ քաղաքում ապրում են հիշողությունները, կանգուն մնացած շենքերն ու հին քաղաքի մասին պատմությունները: Սևազգեստ են նաև շենքերը, որոնք հետևում են, թե ինչպես է իրենց պատերի տակ քայլում գյումրեցին, մաքրում աչքերի արցունքն ու նայում Ամենափրկիչ եկեղեցու փակ դռներին: