Գլխավոր դատախազը «խոշոր ձկներ» չի սիրում. փուշը կոկորդին կմնա

Այսօր՝ կոռուպցիայի դեմ պայքարի միջազգային օրը, լրագրողների հետ ճեպազրույցի ժամանակ Գլխավոր դատախազ Արթուր Դավթյանը խոստովանեց, որ խորհրդարանական ընտրություններից առաջ «SAS group»-ում տեղի ունեցած աղմկահարույց ժողովի ժամանակ աշխատակիցներին սպառնացող ու ծաղրող մարդը Հանրապետական խմբակցության պատգամավոր Արտակ Սարգսյանի եղբայրն է:

Թեև տեղեկությունն արդեն հայտնի էր դարձել ԶԼՄ-ներին, բայց այսօր Դավթյանն ինքն անձամբ դա հաստատեց, թեպետ պնդեց նաև, որ ձայնագրությունը մանրակրկիտ ուսումնասիրել են, բայց, սովորույթի ուժով, հանցակազմ չեն գտել: Դժվար էր պատկերացնել, որ Արթուր Դավթյանն իր պաշտոնավարման որդեգրած անատամ սկզբունքն իրացնելով կարող էր այդ ձայնագրության մեջ հանցակազմ տեսնել:

Ըստ նրա՝ եթե գործատուն աշխատողին ասում է՝ եթե այս կամ անձին չընտրես, քեզ կազատենք և այլն, դա հանցակազմի հատկանիշներ չի պարունակում:

Պատկերացնո՞ւմ եք, սա ասում է երկրի գլխավոր դատախազը, ով պետք է լիներ մարդու իրավունքների ոտնահարման դեմ պայքարող առաջամարտիկը: Այս պարագայում խոսել մարդու աշխատանքային իրավունքի մասին, երևի թե անլուրջ կդիտարկվի:

Մեր շատ հմայիչ, բայց հայկական իրականությունից անտեղյակ դատախազը տեղյակ չէ նաև Զինված ուժերի գլխավոր շտաբի պետի արդեն նախկին տեղակալ Հայկազ Բաղմանյանի շուրջ անդադար պտտվող կոռուպցիոն սկանդալների մասին խոսակցություններից և մամուլի հրապարակումներից: Բնականաբար, դրանք էլ հիմք չեն, սակայն դատախազը խոստանում է.

«Երբ մենք Հայկազ Բաղմանյանի վերաբերյալ կունենանք տեղեկատվություն, կստուգենք, և եթե դա կհիմնավորվի, անկախ նրանից՝ նա աշխատում է, չի աշխատում, ազատվել է, երբ է ազատվել, կհետևի քրեական պատասխանատվություն»:

Դատախազն ասում է սա ու մոռանում ուշադրություն դարձնել Պնախարար Վիգեն Սարգսյանի հայտարարությանն այն մասին, թե ինքը Բաղմանյանին հորդորել է հեռանալ՝ թերացումների պատճառով:

Ի՞նչ թերացում, պարզողս ո՞վ է:

Մի խոսքով՝ կերածիդ բարի վայելում, Հայկազ Բաղմանյան:

Հետաքրքրական է հատկապես այն հանգամանքը, որ նման պատասխաններ տվող Դավթյանը շատ պատասխանատու հայտարարություն է անում.

«Ես Ձեզ խոստանում եմ՝ որ պահին որ «խոշոր ձկան» արարքը հիմնավորվեց, ձեզ կհրավիրեմ նրա դատական նիստին մասնակցելու»:

Ասում է Դավթյանը՝ մոռանալով, որ հիմնավորման գործում էական նշանակություն ունի հենց ինքը, իսկ թե ինչու նա չի ջանում հիմնավորել «խոշոր ձկների» արարքները, հավանաբար, պատկերավոր ասած, իր ախորժակից է: Դատախազը երևի նախընտրում է ճաշակել մանր ձկներ, դե դա հեշտ է, փուշն էլ կոկորդին չի մնա:

NEWSPRESS.am