Սերժ Սարգսյանը հաղորդում տվեց հանցագործության մասին

Օրեր առաջ նախագահ Սերժ Սարգսյանը մասնակցել է Տարածքային կառավարման և զարգացման նախարարության և «Հայաստանի համայնքների միություն» հասարակական կազմակերպության կողմից Դիլիջանում անցկացվող տեղական ինքնակառավարման և տարածքային կառավարման մարմիններին նվիրված խորհրդաժողովի ամփոփիչ նիստին:

Նախագահի՝ այստեղ ունեցած ելույթը լայնորեն լուսաբանվեց և քննարկվեց: Կարելի է այն որակել անգամ սուր և հեղափոխական: Բանն այն է, որ ելույթի զայրացած տողատակը հույս է տալիս մտածելու, որ գեղեցիկ շարադրված տեքստից հետո բնական հաջորդումը լինելու են կոնկրետ գործողությունները՝ ուղղված համայնքների զարգացմանը: Դե իսկ խոսել այսօրվա մեր համայնքների հետամնացության և աղքատության մասին, կարծում ենք, ձեզ համար նորություն չենք ասի: Բայց այն, որ Սերժ Սարգսյանն առիթն օգտագործեց և նման ծավալուն ելույթ ունեցավ, կարելի է ենթադրել, որ «բռնեց» Կարեն Կարապետյանի ձեռքը: Հիշեցման կարգով նշենք, որ վարչապետն էր նման նախաձեռնությամբ հանդես եկել: Նա հանձնարարել էր մարզպետերին համայնքի զարգացման ծրագրեր ներկայացնել: Այս առումով կարելի է ենթադրել, որ Կարապետյան-Սարգսյան տանդեմը մի ուղղությամբ և միևնույն նպատակով է առաջ շարժվում:

Շրջանցելով այս համատեքստում Կարեն Կարապետյան – Սերժ Սարգսյան հնարավոր համագործակցությունը կամ հակառակը՝ զուգահեռ պայքարը, պետք է ուշադրություն դարձնենք Սերժ Սարգսյանի ելույթի կիզակետային նախադասության վրա.

«Գաղտնիք չէ, որ շատ համայնքապետներ չարաշահում են իրենց պաշտոնը և այն օգտագործում անհասկանալի և անընդունելի եկամուտներ ունենալու համար՝ սկսած նրանից, ո՛ր տարբեր խորամանկություններով, տարբեր ձևերով օտարում են համայնքներին պատկանող հողերը, ո՛ր անազնիվ վերաբերմունք են ցուցաբերում համայնքային բյուջեների նկատմամբ, և չմանրամասնեմ, որովհետև ինձ համար շատ տհաճ է այս խոսակցությունը»:

Ինչքան էլ խոսակցությունը տհաճ է, ու նախագահը չի ցանկանում այն զարգացնել, սակայն պետք է արձանագրել, որ երկրի ղեկավարի մակարդակով հաղորդում տրվեց հանցագործության մասին: Մնում է հուսալ՝ տրված հաղորդումը կհամարվի իրավական հիմք և համապատասխան ընթացք կտրվի, իսկ ելույթն էլ չի դասվի հերթականնների ցանկին:

Այս ելույթը Սերժ Սարգսյանի ունեցածներ մյուս ելույթներից առանձնանում է նաև այն հանգամանքով, որ ինքն անձամբ տետատետ նայեց երկիրը կեղեքողների աչքերին և ուղիղ խոսքով ասաց. «Ամո՛թ է»:

«Ուզում եմ բոլորիդ, ոչ մեկին չեմ վախեցնում, ուղղակի ուզում եմ բոլորիդ զգուշացնել՝ եթե որևէ մեկը պետք է այս գործերով զբաղվի, ավելի լավ է գնա ուրիշ տեղ աշխատի: Մենք պատրաստ ենք, անկեղծ եմ ասում, պատրաստ ենք մեր աչքի լույսի պես ձեզ վերաբերվել, պատրաստ ենք մեր հնարավորությունների սահմանում օգնելու՝ լինի դա անձնական, թե համայնքային հարց, բայց մենք պատրաստ չենք տեսնելու, թե ձեզնից ոմանք ինչպես են մեր բնակչության փողերը տանում իրենց տուն: Ամո՛թ է»:

NEWSPRESS.am