Ինչու Կարեն Կարապետյանը ՊՆ-ում պիջակը չգցեց աթոռին ու մատ թափ չտվեց

2018 թվականին ընդառաջ քաղաքական վերադասավորումները շարունակվում են: Դժվար է ասել, թե այսօր կա հստակ որոշում՝ ով որտեղ է լինելու հաջոդ տարի, որ պաշտոնն ումն է սպասում, բայց մի բան կարող ենք արձանագրել՝ պայքարում են բոլորը հանուն իրենց վաղվա օրվա, գալիք պաշտոնի ու լծակների:

Ամենաակտիվ պայքարողների ցանկում է նաև վարչապետ Կարեն Կարապետյանը, ով իր շուրջը մթնոլորտ էր ստեղծել, թե՝ «խնդրել են, եկել եմ կառավարեմ երկիրը և այլ ամբիցիաներ չունեմ», բայց վերջին շրջանում հակառակ ախորժակն է նկատվում:

Այն, որ Կարեն Կարապետյանը վարչապետ նշանակվելու օրվանից իրեն զերծ էր պահում երկրի անվտանգությանն առնչվող հարցերից, թերևս բոլորին է հայտնի: Նա դեռ չի էլ բարձրաձայնել, թե ինչպես է պատկերացնում արցախյան խնդրի լուծման բանաձևը, ուր մնաց խոսի, ասենք, հայ-թուրքական արձանագրություններից: Նա անգամ չկա ներքաղաքական խմորումներում, բայց ահա երեկ եղել է Պաշտպանության նախարարությունում, դիտել ռազմաարդյունաբերական հանձնաժողովի անդամների համար կազմակերպված փակ ցուցադրությունը, ծանոթացել Հայաստանում վերջին երկու տարում ստեղծված կամ զարգացված ռազմական տեխնիկայի ու սպառազինության նմուշներին: Այնուհետև տեղի է ունեցել ՀՀ ռազմաարդյունաբերական հանձնաժողովի նիստը, որի ընթացքում քննարկվել է գիտահետազոտական և փորձարարակոնստրուկտորական աշխատանքների 2018 թ. ծրագիրը:

Վարչապետի այցը ՊՆ մի բանի մասին կարող է խոսել՝ նա պատրաստվում է ընդլայնել իր ազդեցության դաշտը, նրան արդեն սկսել է հետաքրքրել պաշտպանության ոլորտում Հայաստանի պատրաստվածության մակարդակը: Այսինքն՝ ցանկանում է իր կոորդինացիայի տակ առնել նաև այս չափազանց կարևոր ոլորտը: Ինչ խոսք, ասել, թե պաշտպանության ոլորտը կարևոր է 2018թ. վարչապետի պաշտոնում նստած մարդու համար, նշանակում է՝ չասել ոչինչ:

Նկատենք նաև, որ վարչապետն այս ոլորտում իրեն դեռևս այդքան էլ ազատ չի զգում: Նա ՊՆ-ում խորհրդակցություն չհրավիրեց, չհանդիպեց գերատեսչության բարձրաստիճան պաշտոնյաների հետ, ի վերջո պիջակը չկախեց աթոռից, ցուցումներ չտվեց, դիտողություններ չարեց, ՊՆ-ին, այսպես ասած, « թափ չտվեց». գնաց, տեսավ ու վերադարձավ կառավարության շենք՝ պարզապես հիշեցնելով իր գոյության մասին և որ առջևում քաղաքական 2018-ն է:

NEWSPRESS.am