Չալոն մարտական դիրքի պահապանն էր, ամենախիզախ մարտիկն ու զինվորը. Հուշեր մարտական դիրքերից

Հերթական մարտական հերթապահությունն էինք իրականացնում: Նոր-նոր էր մթնել: Հերթապահությունն իրականացնում էինք գետնատնակի մոտակայքում: Հանկարծ ձայներ լսեցինք: Մարտական դիրքի շունը սկսեց գռմռալ: Չալոն, որը մարտական դիրքի ամենահավատարիմ շունն էր, ցատկեց ու կանգնեց դիտակետի դիմաց:

Թեև մութ էր, սակայն նշմարվում էր Չալոյի տեղաշարժը: Դիրքապահներն ամուր բռնեցին զենքերն ու դիրքավորվեցին համապատասխան խրամաբջիջներում: Չալոն շարունակում էր պայքարել դիտակետի դիմաց:

Առաջին դեպքն էր, որ թշնամու դիվերսիոն խմբի ներթափանցման կասկած կար: Չէի հասկանում, թե ինչ է կատարվում: Մտածում էի՝ ուր որ է կկրակեն ինձ վրա: Մտքումս սկսեցի պլանավորել հարմար սցենար, թե ինչ պիտի անեմ այդ դեպքում:

Հանկարծ լռություն տիրեց: Չէր լսվում նույնիսկ Չալոյի ձայնը:

«Չալոն սատկեց»,- մտածեցի ես ու զենքն ամուր բռնելով քայլեցի դեպի դիտակետը: Մարտական դիրքն ատամները սրած սպասում էր, թե ինչ է տեղի ունենալու վայրկյաններ հետո: Քար լռություն: Ոչ մի ձայն չէր լսվում: Մոտեցա դիտակետին կից գտնվող խրամաբջիջն ու դիրքավորվեցի: Ականջներս լարեցի ու սկսեցի որսալ ձայներ: Ապարդյուն էր, քանի որ մահվան նման լռությունը շարունակվում էր:

Լսվեցին կրակոցներ: Լուսածրող գնդակները մեկը մյուսի հետևից անցնում էին մարտական դիրքի վրայով: Մենք պատսպարվեցինք խրամաբջիջներում ու սպասեցինք, թե երբ այն կավարտվի: Բոլորի մտքում Չալոն էր: Դիրքի ավագը հասցրել էր ուսումնասիրել մարտական դիրքի առաջնամասն ու նկատել, որ հակառակորդն ուղղակի սադրում է: Ադրբեջանական դիրքից շարունակում էին անկանոն կրակահերթերը:

Մի քանի րոպե տևող կրակոցներն ավարտվեցին: Հակառակորդը աննպատակ կրակահերթեր արձակելուց հետո լռեց: Լարված իրավիճակն ավարտվեց: Չալոն դեռ չկար: Մենք շարունակեցինք իրականացնել մեր ծառայությունը: Դիրքի ավագը քայլեց դեպի խրամատը, տեսնելու, թե ուր է Չալոն: Մենք անհամբեր սպասում էինք դիրքի ավագին: Անցավ մոտ կես ժամ: Հանկարծ նկատեցինք, որ խրամատում լսվում է դիրքի ավագի ուրախ ձայնը: Նա գալիս էր Չալոյի հետ: Բոլորս ուրախացանք ու շունչ քաշեցինք: Քանի որ Չալոն դիրքի պահապանն էր, դիրքի մարտիկն ու զինվորը: Նրա կորուստն անդառնալի կլիներ մեզ համար:

Մենք շարունակում էինք իրականացնել մարտական հերթապահությունը:

Շարունակելի……

Ա.Զ.