Նիկոլ Փաշինյանի քողը կամաց-կամաց պատռվում է

«Ելք» խմբակցությունն այսօր գրավոր առաջարկ կուղարկի «Ծառուկյան» դաշինքին՝ ԱԺ պատգամավոր, «Հանրապետություն» կուսակցության քաղխորհրդի անդամ Արտակ Զեյնալյանին ՀՀ նախագահի թեկնածու առաջադրելու հարցով բանակցություններ սկսելու հարցով. ասել է Նիկոլ Փաշինյանը: Ծառուկյան խմբակցությունից սպասում են գրավոր դիմումի:

Ինչպես հայտնի է, 2018-ին ՀՀ նախագահն արդեն այն լիազորությունները չի ունենա, ինչ-որ ունի գործող նախագահը և ՀՀ նոր նախագահը մոտավորապես ստանձնելու է անգլիական թագուհու կարգավիճակը: Սա հարցի մի կողմն է, իսկ մյուս կողմը «Ելք» դաշինքի մոտեցումն է:

Անհայտ չէ, որ «Բարգավաճ Հայաստան» կուսակցությունը երբեք էլ ընդդիմադիր չի եղել և չի էլ կարող լինել իր միլիոնատերերով լեցուն անդամների ցանկով. իհարկե ժամանակին նոր քաղաքական տերմին էին հնարել «Բարգավաճում»՝ իրենց կուսակցությունը բնորոշելու համար՝ «այլընտրանքային ընդդիմություն», որն այդպես էլ ոչ ոք չհասկացավ, թե ինչ կատեգորիա է և ինչ քաղաքական գաղափարախոսության է դավանում այդ այլընտրանքային ընդդիմությունը: Ուղղակի այլ բանաձև չէին կարողացել մոգոնել՝ մոգոնել էին վերոնշյալը: Ինչևէ:

Ահա այս հավիտյանս ոչ ընդդիմադիր կուսակցությանը «ընդդիմադիր» «Ելքն» առաջարկում է միասնական նախագահ ընտրել: Ակնհայտ է, որ նոր նախագահի շուքի տակ այլ քաղաքական գործընթացներ են գնում, որ դեռևս տեսանելի չեն անզեն աչքով, այլ հարց է, որ մշտապես ընդդիմադիր դաշտը գրաված Նիկոլ Փաշինյանը նման առաջարկ է անում իշխանամետ կուսակցությոնը: Կա՛մ երկուսն էլ իշխանամետ են, կա՛մ ընդդիմադիր. «Բարգավաճը» երբեք ընդդիմադիր չի եղել, իսկ «Ե՞լքը»:

Անգամ մեկ ընդդիմադիր նախագահ առաջադրվելու պարագայում ՀՀԿ-ն թույլ չի տա, որ այլ նախագահ անցնի՝ միայն ՀՀԿ-ական, և միայն ՀՀԿ-ի հավանությամբ:

Նիկոլ Փաշինյանի այս ժեստը ևս մեկ անգամ հաստատում է, որ մեր երկրում ընդդիմադիր ուժեր չկան, բայց արդյոք այն ակնկալիքը, որ կա «Բարգավաճին» առաջարկելուց, արժե՞ ընդդիմության պատռված քողին:

NEWSPRESS.am