Վարչապետի հերթական գազավիկ-գլուխգործոցը

Վերջին օրերին մամուլի էջերից չեն իջնում մարգարինը կարագի տեղ բանակին մատակարարած ընկերության և դրա շուրջ զարգացումները:

Ինչպես պարզվում է, այն լաբորատորիան, որը մարգարինը կարագ է ներկայացրել, ըստ մամուլի տեղեկությունների, պատկանում է Սննդի անվտանգության պետական ծառայության պետի տեղակալ Եղիշե Մարգարյանին: Եվ նա ոչ միայն հավաստել է, որ մարգարինը կարագ է, այլ հենց նա է այդ մարգարինը ներկրել Հայաստան:

Նշենք, որ Ե. Մարգարյանը վերջերս է նշանակվել ՍԱՊԾ-ում և չլինելով սննդի մասնագետ՝ պարզապես զբաղված է բիզնեսով, և ոչ միայն բիզնեսով, այլև կեղտոտ բիզնեսով:

Նա նախկինում աշխատել է գազի գրասենյակում և վարչապետի կադրերից է: Երբեմն զարմանալի է, թե ինչ է մտածում Կարեն Կարապետյանը, որ ողջ պետական համակարգը լցրել է գազավիկներով. չէ՞ որ այս կադրերը, բացի գազից փող քամելուց, այլ մասնագիտության չեն տիրապետում: Սովորել են պարապ նստել և բարձր աշխատավարձ ստանալ: Իսկ լավագույն կադրերը խարդախություններով էլ ավելի մեծ գումարներ աշխատել:

Մամուլը շարունակում է, որ այն լաբորատորիայի աշխատակիցները, որոնք մարգարինը կարագի տեղ են անցկացրել, չեն ընդունել, որ Եղիշե Մարգարյանն իրենց վրա ճնշումներ է բանեցրել՝ խախտումներ անել ստուգումների ժամանակ, այլ այդ խախտումներն իրենք են արել:

Նկատենք, որ եթե որևէ մեկը ցանկանում է խարդախություն անել, ապա պետք է շարժառիթ ունենա, իսկ լաբորատորիայի աշխատակիցներն իրենց գործն են անում, ոչ թե զբաղված են խմբակային հանցագործություններով՝ հանուն ոչնչի, իսկ ճնշումները Եղիշե Մարգարյանի կողմից տրամաբանական է:

Նշենք, որ ձերբակալված են ՀՀ ԳՆ ՍԱՊԾ Հանրապետական անասնաբուժասանիտարական և բուսասանիտարական լաբորատոր ծառայությունների կենտրոն ՊՈԱԿ-ի մի քանի պատասխանատու աշխատակիցներ:

Ի դեպ, լաբորատորիական խարդավանքները սովորական են. պետական համակարգը չի վստահում մասնավոր լաբորատորիաներին, իսկ մասնավոր լաբորատորիաները՝ պետականին, քանի որ երկու կողմը միմյանց լավ է ճանաչում և տեղյակ են, թե լաբորատորիաներն ինչպես են աշխատում և միմյանց չեն վստահում՝ ունենալով դրա համար բոլոր հիմքերը:

Սակայն այստեղ խոսքը բանակի մատակարարումների մասին է, և հարց է՝ հերթական անգամ մանր ձկներին կբռնեն, թե խարդախության իրական պատասխանատուին:

NEWSPRESS.am