Հայաստան է այցելել Ֆանտոմասը

Այս տարվա 9 ամսվա ընթացքում Հայաստան է այցելել 1 մլն 172 հզր. 402 զբոսաշրջիկ. նախորդ տարվա համեմատ արձանագրել ենք զբոսաշրջիկների այցելությունների մոտ 21% աճ: Ամենաշատ զբոսաշրջիկներ եկել են Ռուսաստանից, Վրաստանից, Իրանից, Ուկրաինայից, ԱՄՆ-ից և Հնդկաստանից: Նման տվյալներ են հրապարակել զբոսաշրջության ոլորտի պատասխանատուները:

Հայաստանից արտագաղթին զուգահեռ ավելացել է զբոսաշրջիկների քանակը, իսկ Հնդկաստանից մեծ քանակի զբոսաշրջիկների այցը կապված էառավելապես ուսման հետ: Այն տվյալները, որ ներկայացում են իբրև զբոսաշրջային զարգացում, հերթական թվային աճպարարությունն է՝ այս անգամ զբսաշրջային ոլորտում:

Հայաստան հիմնականում գալիս են եվրոպական երկրներից, մասնավորապես՝ Ֆրանսիայից՝ աղջիկ տանելու, այցելելու ազգականներին, պարզապես երկիրը տեսնելու և հեռանում են: Եթե Հայաստան այցերը ներկայացվեին ազգությունների կտրվածքով, ապա կերևար՝ Հայաստան այցելողների հիմնական մասը հայեր են:

Իհարկե, զբոսաշրջիկների թվի որոշակի աճ կա, բայց դա հաստատ այն թիվը չէ, որ ներկայացվում է: Ժամանակին, երբ դիտարկում էինք մեկ զբոսաշրջային կազմակերպության տվյալները՝ սկզբնական շրջանում և ներկայացվող արդյունքում, պարզվեց, որ կազմակերպությունը ներկայացրել է 12 զբոսաշրջիկ. նախարարությունը ներկայացրեց 20-25 զբոսաշրջիկ՝ հաստատ իմանալով, որ այդքան չեն եղել. ներքին օղակներն ուռճացնում են, վերին օղակները՝ ևս:

Ամփոփվում է տարին, և ինչպես ամեն տարի, այս տարի ևս յուրաքանչյուր ոլորտ անմիտ աճեր էր ներկայացնում՝ ցուցադրելու ոլորտի աշխատանքային կատարյալ կարողությունները:

Երկրում բացակայում են հարմարավետ ճանապարհները, մաքուր զուգարանները, մատչելի հյուրանոցները, բարձր սպասարկումը. այնպես որ՝ զբոսաշրջային աճի մասին խոսելը, հատկապես՝ աճի, ծիծաղելի է. զբոսաշրջությունն ինքն իրեն չի զարգանում:

Ակնհայտ է, որ շուտով 2 մլն զբոսաշրջիկ կայցելի Հայաստան՝ աճերի հետևից ընկնելով: Զբոսաշրջության ոլորտը ստիպված սեփական ստի տոպրակից է զբոսաշրջիկ հանելու:

NEWSPRESS.am