«Ամո՛թ է, Տարոն, ամո՛թ է». Ամանորյա գլուխկոտրուկ՝ ինչ թվաբանությամբ են զարդարվել տոնածառերը (լուսանկար)

Ամեն տարվա նման, այս անգամ էլ Երևանի սրտում ճյուղ առ ճյուղ հավաքվեց ու զարդարվեց քաղաքի գլխավոր տոնածառը:

Այն, որ նախորդ տարիների նման տոնածառը մնալու է նույն հանդերձանքով՝ դեռևս մի քանի օր առաջ զգուշացրել էր Երևանի փոխքաղաքապետ Արամ Սուքիասյանը: Նա հայտարարել էր.

«Տոնածառի ձևի հետ կապված փոփոխությունը կնշանակի նոր տոնածառ, որը չափազանց թանկ է, և չեմ կարծում, որ արդարացված կլինի այդ ծախսը կատարել համայնքային բյուջեից»:

Դե քանի որ համայնքի բյուջեն պատրաստ չէ շռայլության ու գեթ մեկ Նոր տարվա տոնածառի համար թեթև փոփոխության, քաղաքապետ Տարոն Մարգարյանի գրպաններն առավել ևս դատարկ են նման «զիզիկ-պիզիկների» համար: Հատկապես երբ իր գրպանների գումարները նախատեսված են իր և իր հարազատների համար: Թե կոնկրետ որքան գումարի մասին է խոսքը, Տարոն Մարգարյանը չի անկեղծանում: Անակնկալ է.

«Նվերներն անակնկալ են, Նոր տարվա գիշերն այդ մասին նրանք կիմանան»:

Դժվար չէ գուշակել, թե ինչ նվերներ կունենան Տարոն Մարգարյանի հարազատները. անհասկանալին այն է, թե ինչ թվաբանությամբ է զարդարվել Հանարապետության հրապարակում վեր խոյացած տոնածառը: Վերջին չորս տարվա կտրվածքով համեմատական անցկացնելիս ստանում ենք հետևյալ պատկերը.

Սա գլուխկոտրուկի պես մի բան է. «Գուշակեք, թե որոնք են նկարներում եղած տարբերությունները»…

Այս տոնածառերն ամեն տարի զարդարվել են նույն ձևով, ու այս նկարի միակ և գլխավոր տարբերությունն այն է, որ դրանք զարդարված են տարբեր թվականներին և անհասկանալի թվաբանությամբ:

Թվերի լեզվով՝ ստանում ենք հետևյալ պատկերը.

2014թ. – 32 հազար լուսադիոդային սարք և շուրջ 2600 խաղալիք:

2015թ. – 38 հազար լուսադիոդային լամպ և շուրջ 500 խաղալիք:

2016թ. – նույնը

իսկ՝ ուշադրություն.

2017թ.- 8000 լուսադիոդային լամպ և 400 խաղալիք:

Այս թվերը Երևանի քաղաքապետարանի պաշտոնական կայքից են: Այսինքն՝ տարբեր չափի խաղալիքներով ու լուսային սարքերով, ասել է թե՝ նաև տարբեր չափի ծախսով, քաղաքապետարանն ստացել է միևնույն էֆեկտը:

Հետաքրքիրն այն է նաև, որ այս տարի զարդարված ու լուսավորված նույն տոնածառի վրա կախվել են 30 000-ով քիչ լուսային սարքեր ու 100-ով քիչ խաղալիքներ:

Երևի հենց դա նկատի ուներ քաղաքապետը, երբ հայտարարեց.

«Փորձել ենք մինիմալով ստանանք մաքսիմալ արդյունք»:

Փորձել եք՝ լավ եք արել, բա եթե նման «մինիմալով» հնարավոր էր ստանալ նույն՝ «մաքսիմալ» արդյունքը, ինչո՞ւ շուտ չէիք փորձում: Ո՞ւմ աչքերին էիք ուզում թոզ փչել ձեր ուռճացված թվերով: Ո՞ւր են գնացել թղթին գրված, բայց չգնված խաղալիքների ու լամպերի գումարները:

Հիմա չի բացառվում նաև, որ քաղաքապետն Առողջապահության նախարար Ալթունյանի նման հայտարարի, թե շփոթմունք է եղել: Բայց հարկ է նկատել, որ.

1. Շփոթմունքն անհաջող, անհեթեթ և չստացված արդարացում է.

2. Մի քանի տարի շարունակ միևնույն տոնածառը դնելը և տեքստն արտատպելով՝ միայն այնտեղ թվերը նպատակային փոխելը ու մարդկանց շփոթմունքի մեջ գցելը՝ արդեն շփոթմունք չէ.

3. Բնակիչների բերանից կտրելն ու նրանց գումարների հաշվին հարազատներին ամանորյա գիշերն անակնկալներ մատուցելը՝ հաստատ շփոթմունք չէ.

Շփոթմունքը համայնքի այնպիսի ղեկավար ունենալն է, ում՝ Հրապարակի գեղեցիկ ու լուսավոր ֆոնին հարցնում են քաղաքում առկա աղքատության մասին, ու նա պատասխանում է.

«Հիմա դրա ժամանակը չէ, այդ մասին մեկ այլ առիթով կխոսեմ»:

Իսկ, ներեցե՛ք, այդ ե՞րբ է լինելու այդ առիթը, ամանորյա գիշե՞րը, երբ Ձեր մերձավորներին անակնկալներ մատուցելիս կլինեք, իսկ «միայն կարտոֆիլ ուտող» աղքատները կմտնեն իրենց սառն անկողինն ու կփորձեն քնել՝ անտեսելով քաղցը, քանի որ կարտոֆիլն էլ է թանկացել, ու դրա փողն էլ արդեն չունեն: Թե՞ գինարբուքից հետո, երբ Ձեր հարազատների ամանորյա անակնկալներն արդեն ստացված կլինեն, ու Ձեր կուսակից որոշ ընկերների նման Դուք էլ կհայտարարեք, թե՝

«Դե՛ աղքատներն էսպես, թե էնպես Նոր տարի չէին անելու. փող չունեն…»

Ու հետաքրքիր է՝ ստեղծված այս իրավիճակում պատրա՞ստ է տեսնել և ներել քաղաքապետին երկրի նախագահը, ով հենց օրերս է հայտարարել, թե՝ ներում չի լինի.

«Մենք պատրաստ չենք տեսնելու, թե ձեզնից ոմանք ինչպես են մեր բնակչության փողերը տանում իրենց տուն: Ամո՛թ է»:

Այնպես որ, հենց այս համատեքստում տեղին է նկատել.

«Ամո՛թ է, Տարոն, ամո՛թ է»:

Արմինե Մկրտումյան